25.02.2026 | 23:29
Ինչպես են ադրբեջանցի գործարարները ՌԴ-ին օգնում շրջանցել պատժամիջոցները. FT-ի հետաքննությունը
ԵՄ-ն և Նոր Զելանդիան պայմանավորվել են ազատ առևտրի գոտու շուրջ
Քաղաքականություն
10.07.2023 | 23:00
Եվրամիության և Նոր Զելանդիայի ներկայացուցիչները համաձայնագիր են ստորագրել փոխադարձ ազատ առևտրի, ինչպես նաև Horizon Europe ծրագրին Նոր Զելանդիայի մասնակցության մասին, որի շրջանակներում ԵՄ-ն ներդրումներ է կատարում տարբեր հետազոտություններում։ Փաստաթղթի ստորագրումը համատեղ ելույթում մեկնաբանել են Եվրահանձնաժողովի (ԵՀ) նախագահ Ուրսուլա ֆոն դեր Լեյենը և Նոր Զելանդիայի վարչապետ Քրիս Հիփքինսը, գրում է DW-ի ռուսական ծառայությունը։
Եվրահանձնաժողովի ղեկավարի խոսքով՝ համաձայնագրերի ստորագրումը թույլ կտա 30 տոկոսով ավելացնել առևտուրը ԵՄ երկրների և կղզի-պետությունների միջև, իսկ ԵՄ ներդրումները Նոր Զելանդիայում կավելանան 80 տոկոսով։
«Մենք անհամբերությամբ սպասում ենք մեր լավագույն մտքերն ու տաղանդները համախմբելուն, որպեսզի կարողանանք միասին աշխատել հաջորդ սերնդի բարենպաստ տեխնոլոգիաների, կենսատեխնոլոգիաների, թվային նախագծերի, առողջապահության ուղղությամբ»,- ասել է ֆոն դեր Լեյենը:
Իր հերթին, Նոր Զելանդիայի վարչապետը նշել է, որ ԵՄ-ի հետ ստորագրված համաձայնագիրը «մեծ օգուտներ է բերում երկու գործընկերներին» և արտացոլում է պետության և Եվրամիության համատեղ արժեքները։
ԵՄ-ի և Նոր Զելանդիայի միջև ստորագրված ազատ առևտրի համաձայնագիրը պարտավորեցնում է նաև լուծել կլիմայի հարցերը։ Ուրսուլա ֆոն դեր Լեյենն ասել է, որ սա կարելի է անվանել առաջին նման փաստաթուղթը։
«Առաջին անգամ մենք առևտրային գործարքում ներառել ենք Փարիզի կլիմայի համաձայնագրով ստանձնած պարտավորությունները»,- բացատրել է նա:
Խոսքը 2015 թվականին աշխարհի 196 երկրների կողմից ընդունված բանաձևի մասին է, որով նպատակ է դրվել կանխել 21-րդ դարում մոլորակի միջին ջերմաստիճանի բարձրացումը ավելի քան 1,5 աստիճանով՝ նախաարդյունաբերական մակարդակների համեմատ։
Տաթև Ֆռանգյան
