ԱՄՆ սենատորը դեմ է Թուրքիային F-16-ների վաճառքին, քանի դեռ չի հաստատվել ՆԱՏՕ-ին Շվեդիայի անդամակցությունը

ԱՄՆ Սենատի Հանրապետականների առաջնորդ Միթչ Մաքքոնելը հայտարարել է, որ դեմ է Թուրքիային F-16 կործանիչներ վաճառելուն, քանի դեռ Անկարան չի վավերացրել ՆԱՏՕ-ին Շվեդիայի անդամակցության հայտը, գրում է Turkish Minute-ը:

Հաջորդ շաբաթ Վիլնյուսում կայանալիք ՆԱՏՕ-ի գագաթնաժողովից առաջ տված հարցազրույցում Մաքքոնելը սատարել է Սենատի արտաքին հարաբերությունների հանձնաժողովի նախագահ Բոբ Մենենդեսի՝ Թուրքիային առաջարկվող F-16-ների վաճառքը հետաձգելու առաջարկը։

«Ես այն անձանցից եմ, որոնք կողմ չեն Թուրքիային F-16-ներ վաճառելուն, քանի դեռ ՆԱՏՕ Շվեդիայի ընդունումը չի ավարտվել։ Մենք ակնկալում էինք, որ դա տեղի կունենա Վիլնյուսում»,- ասել է սենատորը։

Իր հերթին, Սենատի Արտաքին հարաբերությունների հանձնաժողովի դեմոկրատ նախագահ Բոբ Մենենդեսը քննադատել է վաճառքը՝ հայտարարելով, որ կտրականապես դեմ է Բայդենի վարչակազմի առաջարկած Թուրքիային F-16 ինքնաթիռների վաճառքին:

Հավելենք, որ Թուրքիան դեռևս 2021 թվականի հոկտեմբերին դիմել էր ԱՄՆ-ին՝ գնելու Lockheed Martin ընկերության 40 F-16 կործանիչ և մոտ 80 արդիականացման լրակազմ՝ իր զինանոցում առկա ինքնաթիռների համար։

Բայդենի վարչակազմն ասել է, որ աջակցում է վաճառքին և ամիսներ շարունակ կապի մեջ է Կոնգրեսի հետ՝ հավանություն ստանալու համար: Այնուամենայնիվ, կանաչ լույսը դեռ չկա։

ՆԱՏՕ-ի դաշնակիցներն էլ ամիսներ շարունակ ճնշում են գործադրում Թուրքիայի վրա, որպեսզի Անկարան վավերացնի Շվեդիայի անդամակցության հայտը։

Էմմա Չոբանյան