16.01.2026 | 09:26
Միջպետական և հանրապետական նշանակության ավտոճանապարհները բաց են
Ադրբեջանի ԱԳՆ-ի նյարդային արձագանքը Նիկոլ Փաշինյանի հայտարարությանը
Քաղաքականություն
28.06.2023 | 18:40
Ադրբեջանի ԱԳՆ-ն արձագանքել է Արցախում ադրբեջանական սադրանքի կապակցությամբ ՀՀ վարչապետ Նիկոլ Փաշինյանի հայտարարությանը։ Մասնավորապես, ԱԳՆ խոսնակ Այխան Հաջիզադեն հայտարարել է, որ ՀՀ վարչապետը, իբր, մոլորեցնում է միջազգային հանրությանը։
«Հայաստանի վարչապետը հերթական անգամ մոլորության մեջ է գցում միջազգային հանրությանը։ Ադրբեջանը միայն պատասխան քայլեր է ձեռնարկել ռազմական սադրանքին, որի արդյունքում ադրբեջանցի զինծառայող է վիրավորվել»,- գրել է նա՝ նշելով, թե Հարավային Կովկասի տարածաշրջանում հիմնական «ապակայունացնող գործոնը», իբր, հայկական զինված ուժերն են։
«Հակառակ միջազգային իրավունքին և եռակողմ հայտարարությունից բխող պարտավորություններին՝ դրանք ամբողջությամբ դուրս չեն բերվել Ադրբեջանի տարածքից (նկատի ունի Արցախը)»,- ասել է Հաջիզադեն՝ Հայաստանին մեղադրելով Ադրբեջանի ներքին գործերին միջամտելու մեջ։
Հավելենք, որ ՀՀ-ն ո՛չ Արցախում, ո՛չ, առավել ևս, Ադրբեջանի տարածքում զինված ուժեր չունի։
Հիշեցնենք՝ Նիկոլ Փաշինյանը թվիթերյան իր էջում անդրադարձել էր Ադրբեջանի զինված ուժերի կողմից Արցախում իրականացված հերթական ագրեսիային։
«Կոչ ենք անում միջազգային հանրությանը գործնական քայլեր ձեռնարկել՝ ապահովելու ԼՂ-ի բնակչության իրավունքներն ու անվտանգությունը։ Մինչ Լաչինի միջանցքը մնում է ապօրինի արգելափակված, այսօր գիշեր անօդաչու թռչող սարքերի կիրառմամբ ադրբեջանական հարձակման հետևանքով այնտեղ կա 4 զոհ։ Բարձր է Հարավային Կովկասում ապակայունացման ռիսկը»,- գրել էր Փաշինյանը։ Հիշեցնենք, որ հունիսի 28-ին՝ ժամը 01:30-ից, Ադրբեջանի ԶՈՒ ստորաբաժանումները հրետանային միջոցներից կրակ էին բացել Մարտունու և Մարտակերտի հայկական դիրքերի ուղղությամբ՝ կիրառելով նաև ԱԹՍ-ներ։ Ադրբեջանական սադրանքի հետևանքով զոհվել է ՊԲ չորս զինծառայող։
Էմմա Չոբանյան
