Ո՞ւր էիք դուք Մանվել Գրիգորյանի, Վիգեն Ստեփանյանի հոգեհանգստին․ Արծվիկ Մինասյանը՝ իշխանությանը․ ՏԵՍԱՆՅՈՒԹ

Իշխանության ներկայացուցիչները հերթական անգամ մերկապարանոց հայտարարություններ են անում. զավեշտն այն է, որ այստեղից փաստորեն հերքվում է սահմանադրական այն ինստիտուտը, որն անմիջական ժողովրդավարության մասին է խոսում, քաղաքացիների օրենսդրական նախաձեռնության մասին: Այս մասին այսօր ԱԺ արտահերթ նիստում հայտարարեց «Հայաստան» խմբակցության քարտուղար Արծվիկ Մինասյանը:
«Իշխող խմբակցության պտգամավորն այս ինստիտուտի խոչընդոտները մի կողմ թողած, փորձում է հարցը տեղափոխել պատգամավորների իրավունքների դաշտ:

Երկրորդ, քննիչ հանձնաժողովի կազմավորման սկզբից սկսած մեր դիրքորոշման մեջ փոփոխություն չի եղել, մենք ասել ենք այլընտրանքային տարբերակ ևս, որը մերժվել է մեծամասնության կողմից: Այլընտրանքային տարբերակը հետևյալն էր՝ պետք է ստեղծվեր առանձին, անկախ իրավասու մարմին, և այդ մարմնում հավասարաչափ պետք է ներկայացված լինեին թե՛ իշխանության, թե ընդդիմության, թե՛ քաղհասարակության, թե՛ Արցախի, թե՛ ՄԻՊ-ի ներկայացուցիչները, և որը պետք է ոչ թե կարճ ժամկետում, այլ հստակ ձևակերպված 18 խնդիրների ուղղությամբ քայլեր պետք է իրականացներ․ այն, ինչ հիմա արվում է քննիչ հանձնաժողովում, մեղավորությունը Նիկոլ Փաշինյանի և սեփական քաղաքական թիմից տեղափոխումն է այլ դաշտ, խուսափելն է այդ պատասխանատվությունից»,-նշեց Մինասյանը:

Ընդդիմադիր պատգամավորն անդրադառնալով զենքի գնման գումարների վերաբերյալ տեղեկատվությանը, Մինասյանը նշեց․ «Բարձրաձայնելով թվերի մասին, ձեռքբերումների մասին՝ փաստորեն արձանագրում ենք, որ նույնիսկ եթե դա իրականություն է, ապա մինչև 2018 թվականը Հայաստանն ու Արցախը ապրում էին անկախ, փաստացի ամբողջական իրավունքների պաշտպանությամբ: Ձեր իշխանության ժամանակ՝ ամբողջությամբ կորուստ, մահ՝ և՛ տարածքների, և՛ մարդկային: Ու շարունակվում է դա:

Հիմա հարց. այդ ձեր ձեռքբերումներն ո՞ւր են, սպառազինության համար ձեր ծախսված գումարները որտե՞ղ են: Ինչո՞ւ այդ ծախսված գումարներն արդյունավետորեն պաշտպանություն չապահովեցին:

Սրանք հարեցր են, որոնք իրավասու մարմինները պետք է քննեն, այլ ոչ թե քաղաքական մեծամասնության այն կազմը, որի օրոք են եղել այս կորուստները»:

«Եվ վերջինը, հոգեքննությամբ անընդհատ զբաղվելը ոչ միայն ազնիվ չէ, այլ դրանով ձեզ եք վարկաբեկում: Պարոն Վիգեն Խաչատրյանի հոգուն հաստատ դրանով հանգստություն չեք բերում: Դուք մինչև հիմա չեք էլ հասկացել, որ մարդու հոգեհանգստին մասնակցությունն անձնական հարց է:
Երբ քաղաքականացնում եք այդ հարցերը, նույն ձևով կարող ենք ձեզ հարցնել՝ ո՞ւր էիք դուք գեներալ Մանվել Գրիգորյանի հուղարկավորությանն ու հոգեհանգստին, ո՞ւր էիք դուք Վիգեն Ստեփանյանի, Արմեն Գրիգորյանի, պատմաբան Արտակ Մովսիսյանի հոգեհանգստին:
Դուք հիմա ապացուցում եք, որ այն արժեքները, որոնք հայտարարել եք և եկել իշխանության, աստիճանաբար և կոպիտ ձևով ջարդելով՝ անցնում եք ամեն ինչի վրայով»,-ընդգծեց Արծվիկ Մինասյանը:

Մանրամասները՝ տեսանյութում։