Լոլոներ մի՛ ասեք, իրավական լուծում գտե՛ք․ քաղաքապետարանն այսուհետ պիտի տեր կանգնի արժեքավոր շենքերին․ ՏԵՍԱՆՅՈՒԹ

Արամի 60 հասցեում 2022 թվականին մայիսին համայնքի կողմից տրվել է ապօրինի շինթույլտվություն։ Այսօր Երևանի քաղաքապետարանի գործակարգավարական նիստի ժամանակ, ի թիվս այլ խնդիրների, բարձրաձայնվեց նաև այս խնդրի մասին։

«Ունենք տգեղ երևույթ․ Երևանի սրտում՝ Արամի 60 հասցեում, ս․թ․ հունիսի 3-4-ն իրականացվել է վերնահարկի ապօրինի կառուցում,- զեկուցեց քաղաքաշինության և հողի վերահսկողության վարչության պետ Յակով Ասատրյանը։- 2022թ․ մայիսին համայնքի կողմից տրվել է մանսարդային հարկի կառուցման շինթույլտվություն, որն, ըստ էության, շենքի արտաքին տեսքի փոփոխություն չի ենթադրել, և տվյալ տարվա մարտին, առանց որևէ նախագծային շեղումների, կառուցապատողը դիմել է ավարտական ակտի, և քաղաքաշինության և հողի վերահսկողության վարչության կողմից այն փաստագրվել է առանց որևէ խախտումների։

Այնուհետ, ս․թ․ հունիսի 3-ին անօրինական՝ առանց որևէ քաղաքաշինական փաստաթղթերի, տվյալ կառուցապատող բնակիչը շարունակել է իր աշխատանքը և էական փոփոխություն է կատարել՝ ամբողջությամբ վերնահարկի ավելացմամբ»։

Ասատրյանի խոսքով՝ բնակիչը տուգանվել է. «Ստացել ենք ԿԳՄՍ նախարարության կողմից գրություն, և Ձեր հանձնարարությամբ, պրն Ավինյան, ընթացիկ շաբաթվա ընթացքում հուշարձան-շենքերի պահպանման կարգի խախտման դեպքով փորձելու ենք վարչարարություն իրականացնել և տվյալ տանիքային հատվածը բերել նախկին տեսքի, որով փաստագրել ենք և տվել ավարտական ակտ»։

«Խոսքը Չարենցի տուն-թանգարանի մասին է, Ճիշտ եմ, չէ՞, »,- հարցրեց Տիգրան Ավինյանը և շարունակեց, որ եթե կարիք կա, իրավակարգավորումները կարելի է փոխել, օրինակ, տուգանքների քանակն անվերջանալի դարձնել։

«Սա ամենացայտուն դեպքն է, երբ հուշարձան-շենքի տանիքին ինչ-որ մեկն, առանց թույլտվության, ինչ-որ բան է անում, բայց Երևանի կենտրոնում ու, առհասարակ, մանսարդների անօրինական կառուցումների դեմ իրավական բոլոր հնարավոր միջոցները եկեք միասին դիտարկենք, որովհետև չպետք է հանդուրժել, հետո գնալ, հետևանքների դեմ պայքարել։ Դա պետք է լինի ամենածանր հանցագործությունների շարքին հավասար։ Հուշարձան-շենքի տանիքին մեկը որոշել է հարկ բարձրացնի․ սա անընդունելի է։

Այդ իրավական բացատրությունները, այդ լոլոներն էլ՝ եկեք վերջացնենք։ Գնացեք, իրավական լուծումը գտեք, որովհետև Երևանի քաղաքապետարանն այսուհետ պետք է տեր կանգնի քաղաքին, հուշարձան-շենքերին, արժեքավոր դիմագծերով շենքերին, և, առհասարակ, չպետք է թույլ տա նորմատիվներից դուրս, շինթույլտվություն չունեցող որևէ տեսակի շինարարություն»։

Տիգրան Ավինյանը հանձնարարեց նման դեպքում կիրառել ամենակոշտ մեթոդները

Հիշեցնենք, որ խնդրի մասին առաջինը բարձրայանել էր Factor TV-ն, իր ՝ ««Խայտառակություն»․ ինչպես և ում թողտվությամբ է կցակառույցը հայտնվել հուշարձան-շենքի տանիքին»  վերտառությամբ հրապարակման մեջ։

Մանրամասները՝ տեսանյութում։