Ալիևը՝ Լաչինում ապօրինի անցակետի տեղադրման և Արցախի կարգավիճակի մասին

Ադրբեջանի նախագահ Իլհամ Ալիևն կոմանդո զորամասերից մեկում արարողության ժամանակ կրկին անդրադարձել է Արցախի դեմ ագրեսիային։

«Հայաստանն ու նրա օտարերկրյա հովանավորները հավատում էին, որ ընդմիշտ կպահեն օկուպացիայի տակ գտնվող մեր հողերը։ Մենք խափանեցինք նրանց չար ծրագրերը»,- ասել է Ալիևը։

Նա նաև խոսել է Լաչինի միջանցքում ապօրինի տեղադրված անցակետի մասին։

«Երկու ամիս առաջ Լաչինի ուղղությամբ սահմանային անցակետի ստեղծումը մեր ուժեղ քաղաքական կամքի ցուցիչն է»,- ասել է Ադրբեջանի նախագահը՝ նշելով, թե պատերազմից հետո առաջին ամիսներին «Հայաստանի հովանավորները փորձում էին հին թեզեր պարտադրել»։

«Բայց մենք կտրականապես մերժեցինք դրանք։ Այսօր բոլորը տեսնում են, որ այն ուժերը, որոնք ժամանակին Ղարաբաղի հայերի համար որոշակի հատուկ կարգավիճակ էին պահանջում, արդեն բոլորովին այլ հայտարարություններ են անում։ Մենք տեսնում ենք, որ Հայաստանի ղեկավարները, որոնք ժամանակին ասում էին՝ «Ղարաբաղը Հայաստան է և վերջ», հիմա կրկնում են իմ խոսքերը՝ «Ղարաբաղն Ադրբեջան է»։ Այսինքն՝ այս ամենն արդյունքն է այն քաղաքականության, որ մենք վարում ենք վերջին երկուսուկես տարիների ընթացքում։ Մեզ վրեժխնդրության մեջ մեղադրողները թող գնան հայելու մեջ նայեն։ Մենք արդարություն ենք պահանջում, ոչ թե վրեժ, պահանջում ենք արդարության պաշտպանություն։ Մենք պահանջում ենք, որ ոչ ոք չխառնվի մեր ներքին գործերին։ Մենք պահանջում ենք, որ բոլոր երկրները հարգեն մեր տարածքային ամբողջականությունը գործով, ոչ թե խոսքով, այդ դեպքում մենք կհարգենք նրանց տարածքային ամբողջականությունը»,- հայտարարել է նա։

Էմմա Չոբանյան