Ալիևն այցելել է կոմանդո զորամաս և հայտարարել նոր ԱԹՍ-ների ու հեռահար հրթիռների մատակարարման մասին

Ադրբեջանի նախագահ Իլհամ Ալիևն այցելել է կոմանդո զորամաս, ծանոթացել ստեղծված պայմաններին ու զինծառայողներին հանձնել զորամասի մարտական դրոշը, գրում են ադրբեջանական լրատվամիջոցները։ Ի դեպ, չի հաղորդվում, թե որտեղ է գտնվում զորամասը։

Ալիևը նաև մի շարք հայտարարություններ է արել՝ ազդարարելով նմանատիպ նոր զորամասերի բացման մասին։

«Արդեն գործում են մի քանի զորամասեր, նախատեսվում է բացել նորերը: Այսպիսով, մենք կշարունակենք բարձրացնել մեր մարտունակությունը»,- ասել է Ալիևը՝ նշելով, որ հատուկ նշանակության ջոկատների թիվն «ամեն օր ավելանում է»:

Նա նշել է, որ Բաքուն շարունակում է բանակը սպառազինությամբ համալրելու գործընթացը, այդ թվում՝ հեռահար հրթիռներով:

«Պատերազմից հետո նոր սպառազինությունների գնման գործընթացը շարունակվում է, արդեն կնքվել են բազմաթիվ պայմանագրեր՝ ինչպես մեր երկիր նոր անօդաչու թռչող սարքերի, այնպես էլ հեռահար հրթիռների մատակարարման համար, որոնք օժտված են մեծ կործանարար ուժով և բարձր ճշգրտությամբ»,- ասել է Ալիևը։

Նա նշել է, որ բանակի հետագա հզորացումը մնում է թիվ մեկ խնդիրը, և որ բանակի կառուցման գործընթացը նոր թափ է ստացել։

«Պատերազմից հետո բանակի կառուցման համար լրացուցիչ քայլեր են արվում, և դրա անհրաժեշտությունը մեծ է, քանի որ աշխարհաքաղաքական իրավիճակն աշխարհում սրվում է։ Մեր տարածաշրջանում նոր սպառնալիքներ կան, «ռևանշիստական ​​ուժերը» գլուխ են բարձրացնում Հայաստանում»,- հայտարարել է Ադրբեջանի նախագահը։

Էմմա Չոբանյան