«Դարի կռիվը»․ Իլոն Մասկն ու Մարկ Ցուկերբերգը պայմանավորվել են մենամարտել

Աշխարհի ամենահայտնի տեխնոլոգիական միլիարդատերերից երկուսը՝  Իլոն Մասկը և Մարկ Ցուկերբերգը, պայմանավորվել են մենամարտել, գրում է BBC-ն։

Մասկը իրեն պատկանող Twitter-ում գրել է, որ «պատրաստ է կռվելու» Ցուկերբերգի հետ: Ցուկերբերգը՝ Facebook-ի և Instagram-ի մայր ընկերություն Meta-ի ղեկավարը, հրապարակել է Մասկի թվիթի սքրինշոթը՝ «Ուղարկիր ինձ վայրը» մակագրությամբ։

Այնուհետև Մասկն արձագանքել է Ցուկերբերգի պատասխանին՝ «Vegas Octagon»: Սա տարածք է, որն օգտագործվում է Ultimate Fighting Championship (UFC) մենամարտերի համար․ UFC-ն տեղակայված է Լաս Վեգասում:

Այս ամենն արդեն վիրուսային է  դարձել սոցիալական մեդիայի օգտատերերի շրջանում, որոնք քննարկում են, թե ով կհաղթի մենամարտում, մինչդեռ մյուսները հրապարակում են մեմեր, ներառյալ՝ ծաղրանկարով պաստառներ, որոնք գովազդում են մենամարտը:

Twitter-ը, ի դեպ, հարցի վերաբերյալ որևէ մեկնաբանություն չի տվել լրատվամիջոցին։

Ամեն ինչ սկսվել է այն բանից, որ Իլոն Մասկը ծաղրել է Մարկ Ցուկերբերգի՝ մրցակիցների տեխնոլոգիաների կրկնօրինակման ռազմավարությունը Թվիթերում։

Այս ամսվա սկզբին Meta-ն անձնակազմին է ներկայացրել տեքստային սոցիալական ցանցի ծրագրերը, որը նախատեսված է Twitter-ի հետ մրցակցելու համար։ Այն կարող է թույլ տալ օգտատերերին հետևել այն օգտահաշիվներին, որոնց արդեն հետևում են Instagram-ում։

Սա կարող է ավելի մեծ մրցակից լինել Իլոն Մասկի Twitter-ի համար, քան BlueSky-ը կամ Mastodon-ը:

Էմմա Չոբանյան