08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Հուլիսի 1-ից թոշակը կբարձրանա, անկանխիկ եղանակով կատարված ծախսերի հետվճարի ծրագիրը կերկարաձգվի
Հասարակություն
22.06.2023 | 11:47
Կառավարության այսօրվա նիստում որոշվեց երկարաձգել անկանխիկ վճարումներից կենսաթոշակառուներին հետվճար տրամադրելու ժամկետը մինչև 2023 թ. դեկտեմբերի 31-ը:
Հիշեցնենք՝ այս նախաձեռնության ժամկետ էր սահմանված մինչև հունիսի 30-ը:
Աշխատանքի և սոցւիալական հարցերի նախարար Նարեկ Մկրտչյանի խոսքով՝ մեկնարկի պահից սկսած բոլոր ցուցանիշներով արձանագրվել է դրական դինամիկա, անկանխիկ գործարքների թիվը 8 անգամ աճել է։
«Եթե 2022-ին դա 525 մլն դրամ էր, ապա 2023-ի մայիսի դրությամբ՝ 4,4 մլրդ դրամ: Մեկնարկի սկզբին շահառուների թիվը 16 900 էր, 2022-ի դեկտեմբերին 66 800, իսկ արդեն մայիսին՝ շահառուների թիվը հատել է 114 հազարը:
Մեկ շահառուին հաշվարկված միջին հետվճարի չափը նույնպես աճել է, 2700-ից դառնալով 3300 դրամ: Ընդհանուր հետվճարը կազմել է շուրջ 2,38 մլրդ դրամ»,-ասաց նախարարը՝ հավելելով, որ կենսաթոշակառուների 82,2 տոկոսն այժմ թոշակն ստանում է բանկային քարտերով»,- նշեց նախարարը։
Վարչապետ Նիկոլ Փաշինյանը նկատեց, որ 595 հազար թոշակառուներից ու նպաստառուներից այս ծրագրից օգտվում է միայն 114 հազարը:
Վարչապետը նաև հայտարարեց, որ հուլիսի 1-ից կենսաթոշակը կբարձրանա։
«Նախորդ տարի կենսաթոշակները բարձրացրել ենք երկու անգամ, ես համարում եմ, որ բարձրացրել ենք երեք անգամ՝ հաշվի առնելով այս էֆեկտը (անկանխիկ վճարումներից կենսաթոշակառուներին հետվճար տրամադրելը),- նշեց Փաշինյանը՝ հավելելով՝ հույս ունեմ՝ չեք մոռացել, որ ևս մեկ անգամ հուլիսի 1-ից կենսաթոշակները բարձրացնելու ենք։
Նախարար Մկրտչյանը հավելեց, որ կառավարության հաջորդ նիստում մանրամասներ կներկայացվեն, թե որ շահառուների կենսաթոշակը որքան կբարձրանա։
Մանրամասները՝ տեսանյութում։
