26.06.2026 | 19:10
Դրոշներ՝ բոլոր համայնքների մուտքերի մոտ․ ՔՊ-ականների նախագիծն ընդգրկվել է ԱԺ արտահերթ նիստի օրակարգում
Ժամանակն է, որ Թուրքիան վավերացնի ՆԱՏՕ-ին Ստոկհոլմի անդամակցությունը․ Շվեդիայի ԱԳ նախարար
Քաղաքականություն
21.06.2023 | 22:37
Թուրքիայի խորհրդարանը պետք է սկսի վավերացնել ՆԱՏՕ-ին անդամակցելու Շվեդիայի հայտը, քանի որ Ստոկհոլմը կատարել է ռազմական դաշինքին միանալու՝ Անկարայի հետ համաձայնագրով ստանձնած իր պարտավորությունները։ Այս մասին հայտարարել է Շվեդիայի արտգործնախարար Թոբիաս Բիլսթրոմը, գրում է Gercek news-ը։
«Մենք կարծում ենք, որ արել ենք այն, ինչ մեզանից ակնկալվում էր։ Հիմա ժամանակն է, որ Թուրքիայի խորհրդարանը սկսի վավերացման գործընթացը»,- ասել է Բիլսթրոմը։
Անկարան մշտապես պնդում է, որ Շվեդիայում կան ահաբեկիչներ համարվող զինյալ խմբավորումների անդամներ, ինչն էլ ավելի է բարդացրել բանակցությունները։ Թուրքիայի կառավարությունը Շվեդիայից պահանջել է նաև խիստ միջոցներ ձեռնարկել Ստոկհոլմում տեղի ունեցող հակաթուրքական ցույցերի դեմ։
Բիլսթրոմը նաև հույս է հայտնել, որ Շվեդիայի անդամակցությունը կարող է ժամանակին հաստատվել՝ հուլիսի կեսերին Վիլնյուսում կայանալիք ՆԱՏՕ-ի գագաթնաժողովի առաջ՝ ընդգծելով, որ այլընտրանքային ծրագիր գոյություն չունի։
Հավելենք, որ վերջերս Թուրքիայի նախագահ Ռեջեփ Թայիփ Էրդողանը հայտարարել էր, որ Վիլնյուսի գագաթնաժողովից առաջ հայտի վավերացում չի սպասվում։
ՆԱՏՕ-ի անդամներից, Թուրքիայից զատ, նաև Հունգարիան է, որ չի վավերացրել Շվեդիայի անդամակցության հայտը։
Էմմա Չոբանյան
