08.10.2026 | 17:43
Առուշանյանը ՔՊ կուսակցության անդամ չէ և չի պատրաստվում դառնալ․ Արմեն Խաչատրյան․ ՏԵՍԱՆՅՈՒԹ
ՆԱՏՕ-ն Ուկրաինային կօգնի զինված ուժերի արդիականացման հարցում
Քաղաքականություն
21.06.2023 | 14:09
ՆԱՏՕ-ի գլխավոր քարտուղար Յենս Ստոլտենբերգն Ուկրաինային խոստացել է հետագա օգնություն երկրի զինված ուժերի արդիականացման գործում, գրում է DW-ի ռուսական ծառայությունը։
«Լիտվայի մայրաքաղաք Վիլնյուսում դաշինքի երկրների գագաթնաժողովում դաշնակիցները կընդունեն երկարաժամկետ օգնության փաթեթ, որն Ուկրաինան կհամապատասխանեցնի ՆԱՏՕ-ի չափանիշներին»,- ասել է նա Tagesspiegel պարբերականին տված հարցազրույցում։
«Մեր օգնությամբ ուկրաինացի զինվորականները կկարողանան ապահովել խորհրդային բանակից անցումը դեպի ՆԱՏՕ-ի չափանիշներով գործող ժամանակակից զինված ուժեր»,- համոզմունք է հայտնել Ստոլտենբերգը։
Հյուսիսատլանտյան դաշինքի գլխավոր քարտուղարը, մեկնաբանելով Ուկրաինայի ճակատներում տեղի ունեցած վերջին իրադարձությունները, ընդգծել է Ռուսաստանի ագրեսիայից պաշտպանվող Ուկրաինային հետագա օգնություն ցուցաբերելու կարևորությունը։
«Մենք տեսնում ենք, որ Ուկրաինան, երբ մենք ամիսներ շարունակ մարզել և զինել ենք իր բանակը, կրկին կարողանում է տարածքային հաջողությունների հասնել։ Բայց սա բարդ տարածք է, ռուսական բանակը կառուցել է ամուր պաշտպանական գծեր, ականապատ դաշտեր և տանկային պատնեշներ։ Ուկրաինացիների համար հեշտ չէ առաջ գնալ, և դրա համար էլ մեր աջակցությունն այդքան կարևոր է»,- պարզաբանել է Ստոլտենբերգը։
ՆԱՏՕ-ի անդամ 31 երկրների ներկայացուցիչների մասնակցությամբ գագաթնաժողովը նախատեսված է հուլիսի 11-12-ը։
Տաթև Ֆռանգյան
