16.12.2025 | 10:19
«Թրամփի ծրագիրը» նույնն է, ինչ «Զանգեզուրի միջանցքի» նախագիծը, որին Թեհրանը կտրականապես դեմ է. Վելայաթի
Էնթոնի Բլինքենը բանակցություններ կանցկացնի Թուրքիայի նորանշանակ ԱԳ նախարար Հաքան Ֆիդանի հետ
Քաղաքականություն
20.06.2023 | 12:14
ԱՄՆ պետքարտուղար Էնթոնի Բլինքենը կհանդիպի Թուրքիայի արտգործնախարար Հաքան Ֆիդանի հետ Ուկրաինայի վերականգնման համաժողովի շրջանակում, որը նախատեսվում է անցկացնել հունիսի 21-22-ը Լոնդոնում, հայտնում է Al-Monitor-ը։
Լրատվամիջոցի դիվանագիտական աղբյուրները անանունության պայմանով հայտնել են, որ օրակարգի գլխավոր թեման լինելու է Թուրքիայի շարունակական առարկությունները Շվեդիայի՝ ՆԱՏՕ-ի դաշինքին միանալու հարցում։ Աղբյուրները այլ մանրամասներ չեն հայտնել և հրաժարվել են մեկնաբանել, թե ով է խնդրել հանդիպում անցկացնել։
Այս հանդիպումը դառնալու է առաջինը, ինչ թուրքական հետախուզության նախկին ղեկավար Հաքան Ֆիդանը Ռեջեփ Թայիփ Էրդողանի նախագահի պաշտոնում վերընտվելուց հետո նշանակվել է ԱԳ նախարարի պաշտոնում։
Բլինքենը Շվեդիայի ՆԱՏՕ-ի անդամակցության հարցով Ֆիդանի վրա ճնշում էր գործադրել նաև հունիսի 8-ի հեռախոսազանգի ընթացքում։ ԱՄՆ Պետքարտուղարությունը հրաժարվել է մեկնաբանություն տալ առաջիկա սպասվող հանդիպման վերաբերյալ։
Միացյալ Նահանգները կոչ են անում Թուրքիային ժամանակին հաստատել Շվեդիայի անդամակցությունը մինչ ՆԱՏՕ-ի գագաթնաժողովը, որը տեղի է ունենալու հուլիսի 11-12-ը Լիտվայի մայրաքաղաք Վիլնյուսում։ Այնուամենայնիվ, Էրդողանը շարունակում է վկայակոչել սկանդինավյան երկրի ձախողումը` պատշաճ կերպով լուծելու Թուրքիայի անվտանգության խնդիրները, մասնավորապես` Թուրքիայի բազմաթիվ քաղաքացիների արտահանձնման մերժումը, որոնց համարում է ահաբեկիչներ:
Հավելենք, որ Թուրքիան ու Հունգարիան մնում են ՆԱՏՕ-ի միակ անդամները, որոնք չեն վավերացրել Շվեդիայի՝ դաշինքին միանալու հայտը։
