Կիևը կատարել է ԵՄ-ին անդամակցելու շուրջ բանակցությունների պայմաններից երկուսը

Ուկրաինան կատարել է ԵՄ-ին անդամակցելու համար բանակցություններ սկսելու յոթ պայմաններից երկուսը։ Ինչպես գրում է Reuters-ը՝ վկայակոչելով երկու բարձրաստիճան եվրոպացի պաշտոնյաների, այս տվյալները տեղ են գտել Եվրահանձնաժողովի միջանկյալ զեկույցում, որը կներկայացվի այս շաբաթվա վերջին։
Աղբյուրներից մեկը պարզաբանել է, որ խոսքը կոնկրետ դատական բարեփոխումների ու ԶԼՄ-ների մասին օրենսդրության մասին է՝ հավելելով, որ զեկույցը «չափավոր դրական կլինի»։
Ուկրաինա ՌԴ ներխուժումից 4 ամիս անց ԵՄ-ն «խիստ խորհրդանշական ժեստ» արեց՝ Ուկրաինային ԵՄ պաշտոնական թեկնածուի կարգավիճակ շնորհելով, հիշեցնում է գործակալությունը։
Անդամակցության բանակցությունների մեկնարկը, սակայն, կապվել էր Կիևի կողմից յոթ պայմանների կատարման հետ, ներառյալ դատական բարեփոխումները և կոռուպցիայի դեմ պայքարը: Ուկրաինան իր հերթին կոչ է արել այս տարի սկսել ԵՄ-ին իր անդամակցության շուրջ բանակցությունները։
Reuters-ի զրուցակիցներից մեկի խոսքով, որը ծանոթ է Եվրահանձնաժողովի զեկույցի բովանդակությանը, սակայն ցանկացել է անհայտ մնալ, այս փաստաթղթում գլխավորը «ոչ թե իրականության զարդարումն է, այլ առաջընթացի ճանաչումը»։
Սրա հետ մեկտեղ, զեկույցին ծանոթ մեկ այլ աղբյուր գործակալությանը տված հարցազրույցում ասել է, որ Ուկրաինայում դատական համակարգի բարեփոխման հարցում որոշակի առաջընթաց կա, «սակայն, դեռևս կան առանցքային բարեփոխումներ, որոնք պետք է իրականացվեն»։ «Ամեն ինչ չէ, որ գոհացուցիչ է»,- հավելել է զրուցակիցը։
Ակնկալվում է, որ ԵՄ-ին Ուկրաինայի անդամակցության շուրջ բանակցություններ սկսելու հնարավորության մասին որոշումը կարող են ընդունել ԵՄ անդամ 27 երկրներ 2023 թվականի դեկտեմբերին։