Էկվադորում կինը սկսել է կյանքի նշաններ ցույց տալ սեփական հուղարկավորության ժամանակ․ նա ապրել է ևս մեկ շաբաթ

Էկվադորում 76-ամյա կնոջը ողջ են հայտնաբերել սեփական հուղարկավորության ժամանակ, գրում է BBC-ի ռուսական ծառայությունը։

Առաջին անգամ բժիշկները Բելլա Մոնտոյայի մահը գրանցել են հունիսի 9-ին Բաբախոյո քաղաքում։ Նրան ուղարկել են թաղման բյուրո։

«Մեզ նաև մահվան վկայական են տվել»,- տեղական լրատվամիջոցներին պատմել է նրա որդին՝ Գիլբերտո Բարբերան։

Արարողության մեկնարկից մոտավորապես 5 ժամ հետո կնոջ հարազատները սկսել են «դագաղից ձայներ լսել»։ Տեղական ԶԼՄ-ները հայտնում են, որ կինը սկսել է կենդանության նշաններ ցույց տալ այն բանից հետո, երբ հարազատները բացել են դագաղը՝ թաղումից առաջ հագուստը փոխելու համար։

Երբ պարզ է դարձել, որ կինը ողջ է, հարազատները շտապօգնություն են կանչել ու կնոջը տեղափոխել նույն հիվանդանոցը, որտեղ արձանագրել էին նրա մահը։ Միջադեպից առաջ Մոնտոյան հոստիպատալացվել էր ինսուլտի կասկածանքով։

«Նրա մոտ տեղի է ունեցել սրտի ու շնչառության կանգ, նա չի արձագանքել վերականգնողական գործողություններին, այդ պատճառով էլ հերթապահ բժիշկը գրանցել է նրա մահը»,- ասվում է Էկվադորի Առողջապահության նախարարության հայտարարության մեջ։

Կրկնակի բուժման ընթացքում նրա վիճակը կայունացել է, բայց՝ ոչ երկար։ Մոնտոյան յոթ օր գտնվել է վերակենդանացման բաժանմունքում, որից հետո Առողջապահության նախարարությունը հայտնել է, որ նա մահացել է իշեմիկ ինսուլտից։ Կնոջը թաղել են տեղի գերեզմանոցում։

Լրատվամիջոցները նշում են, որ Էկվադորի իշխանությունները մտադիր են հետաքննել միջադեպի բոլոր հանգամանքները և ուսումնասիրել այդ հիվանդանոցում մահվան վկայականների տրամադրման կարգը։

Էմմա Չոբանյան