15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Հյուսիսային Կորեան խիստ դժգոհ է հետախուզական արբանյակի անհաջող արձակումից․ առաջիկայում նոր փորձ կարվի
Քաղաքականություն
19.06.2023 | 22:30
Հյուսիսային Կորեան սեփական արտադրության ռազմական հետախուզական արբանյակի անհաջող արձակումն անվանել է տարվա առաջին կիսամյակի ամենադժվար ձախողումը։ Իշխող Կորեայի աշխատավորական կուսակցության կենտրոնական կոմիտեին ուղղված զեկույցում արձակումը վերահսկող պաշտոնյաները խիստ քննադատության են ենթարկվել և մեղադրվել բացահայտ անպատասխանատվության մեջ, հաղորդել են հյուսիսկորեական լրատվամիջոցները, գրում է DW-ի ռուսական ծառայությունը:
Հայտարարվել է մոտ ապագայում հետախուզական արբանյակի արձակման նոր փորձի մասին։ Հյուսիսային Կորեան, որը միջազգային պատժամիջոցների տակ է իր միջուկային և հրթիռային ծրագրի պատճառով, ընդունել է տեխնիկական խնդիրների առկայությունը մայիսի 31-ին արբանյակի արձակման ձախողումից անմիջապես հետո: Հրթիռային մեքենան պետք է տիեզերք հասցներ առաջին հյուսիսկորեական հետախուզական արբանյակը, բայց այն ընկել է Դեղին ծովը՝ հարավկորեական կղզիներից մեկի մոտակայքում։
Հարավային Կորեան հայտնաբերել է ծովից հրթիռների բեկորների մեծ մասը և ուսումնասիրում է այն՝ պարզելու, թե որքան առաջընթաց է գրանցել ԿԺԴՀ-ն հրթիռային տեխնոլոգիաների մշակման գործում: Հեռահար տիեզերական և ռազմական հրթիռների արտադրության տեխնոլոգիաները գրեթե նույնական են։
Կորեայի աշխատավորական կուսակցության կենտրոնական կոմիտեն մի քանի օր տևած ժողովի ընթացքում ամփոփել է ընթացիկ տարվա ռազմական, քաղաքական և տնտեսական կարևորագույն ծրագրերի իրականացման միջանկյալ արդյունքները։ Հանդիպմանը ներկա է եղել նաև Հյուսիսային Կորեայի առաջնորդ Կիմ Չեն Ընը։ Միջոցառման մասնակիցներն արձանագրել են ոչ միայն առաջընթաց երկրի ռազմավարական ներուժի կերտման գործում, այլև որոշակի թերություններ, որոնցից ամենալուրջը ռազմական հետախուզական արբանյակի անհաջող արձակումն էր։
Տաթև Ֆռանգյան
