15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Եվրահանձնաժողովը չինական Huawei-ն և ZTE-ն որպես անվտանգության սպառնալիք է որակել
Քաղաքականություն
16.06.2023 | 23:07
Չինական Huawei և ZTE հեռահաղորդակցական ընկերությունների սարքավորումների օգտագործումը 5G ցանցերում կարող է «զգալիորեն ավելի բարձր ռիսկեր» ստեղծել ԵՄ-ի համար, քան սարքավորումների այլ մատակարարների արտադրանքը։ Այս մասին ասվում է Եվրահանձնաժողովի հայտարարության մեջ, գրում է DW-ի ռուսական ծառայությունը։
Եվրահանձնաժողովի կայքում հրապարակվել է «5G կիբերանվտանգության քայլերի» մասին հայտարարությունը, որն ուշադրություն է հրավիրում չինական ընկերությունների սարքավորումների հետ աշխատելիս ԵՄ անվտանգության հնարավոր ռիսկերի վրա։ Նշվում է, որ 5G-ն կարևոր ենթակառուցվածք է, որն ազդում է ԵՄ-ի ներքին շուկայի, ինչպես նաև սոցիալական ու տնտեսական ֆունկցիաների վրա։ Փաստաթղթում ընդգծվում է ԵՄ անվտանգության համար ռիսկերի հետ կապված «լուրջ մտագոհությունը», որոնք ներկայացնում են բջջային կապի որոշ սարքավորումների մատակարարները։
ԵՄ որոշ երկրներ նախկինում հրաժարվել են սարքավորումներ գնել Huawei-ից և ZTE-ից։ Դրան նպաստեց Եվրամիությունում 5G Toolbox-ի ստեղծումը՝ ազգային բջջային ցանցերը լրտեսությունից և դիվերսիոն գործողություններից պաշտպանելու առաջարկությունների ցանկը:
Բրյուսելը սա դրական է համարում և Եվրահանձնաժողովին ուղղորդում ապագայում ձեռնպահ մնալ այս երկու ընկերությունների ծառայություններից։
Հավելենք, որ 2019 թվականին Huawei-ի հիմնադիր Ռեն Չժենֆեյն առաջարկել էր Գերմանիային կնքել «հակալրտեսական համաձայնագիր»՝ լուծելու ընկերության սարքավորումների օգտագործմամբ լրտեսության և դիվերսիայի հետ կապված իր մտահոգությունները:
Սակայն այն բանից հետո, երբ Վաշինգտոնն ընկերությանը մեղադրեց լրտեսության մեջ, իսկ ԱՄՆ Առևտրի նախարարությունն այն ներառեց սև ցուցակում, այն սկսեց ԵՄ-ում նույնպես կասկածներ առաջացնել։
Անվտանգության նկատառումներից ելնելով՝ Եվրահանձնաժողովն ու Եվրախորհրդարանն արգելել էին նաև իրենց աշխատակիցներին ծառայողական հեռախոսներում Tik Tok չինական հավելվածը ներբեռնել։
Էմմա Չոբանյան
