08.10.2026 | 16:57
ՀՖՖ. Եղիշե Մելիքյանն ունի ՀՀ քաղաքացիություն
Օվերչուկը՝ ճանապարհների ապաշրջափակման հարցով Երևանի ու Բաքվի բանակցությունների մասին
Քաղաքականություն
16.06.2023 | 12:22
Մոսկվան գրեթե ամենօրյա ռեժիմով կապի մեջ է Բաքվի ու Երևանի հետ տրանսպորտային կապերի ապաշրջափակման հարցով։ Այս մասին Ռիա Նովոստիի հետ զրույցում հայտարարել է ՌԴ փոխվարչապետ Ալեքսեյ Օվերչուկը։
«Ռուսաստանը մասնակցում է բանակցություններին՝ առաջարկելով լուծումներ, ապահովում է հարթակ երկխոսության համար և կապը Հայաստանի ու Ադրբեջանի փոխվարչապետերի միջև։ Ես երբեք չեմ պատասխանում հարցին, երբ տեղի կունենա ապաշրջափակումը, որքան արագ կամ դանդաղ։ Երբ կողմերը պայմանավորվեն, այդ ժամանակ էլ տեղի կունենա»,-հայտարարել է նա։
Օվերչուկը նաև հայտնել է, որ Ադրբեջանի փոխվարչապետ Շահին Մուտաֆաևի հետ հանդիպել է Պետերբուրգի տնտեսական ֆորումի շրջանակներում ու քննարկել հարցեր, որոնք մնացել են Մոսկվայում Հայաստանի ու Ադրբեջանի գործընկերների հետ հանդիպումից հետո։
«Հիմնական աշխատանքը շարունակվում է մշտական ռեժիմով։ Մենք գրեթե ամեն օր կապ ենք պահպանում ադրբեջանական և հայկական կողմերի հետ տրանսպորտային կապերի ապաշրջափակման թեմայով։ Մենք մշտապես շփվում ենք՝ հեռախոսազանգեր, ֆայլերով փոխանակումներ։ Աշխատանքը միայն հանդիպումից հանդիպում չի ընթանում»,-ասել է Օվերչուկը։
Հիշեցնենք, որ հունիսի 2-ին Մոսկվայում տեղի էր ունեցել Հայաստանի, ՌԴ-ի ու Ադրբեջանի փոխվարչապետերի գլխավորած աշխատանքային խմբի հանդիպումը։
Էմմա Չոբանյան
