14.12.2024 | 19:57
Ինչ իրավիճակ է ճանապարհներին 19։35-ի դրությամբ
Հայաստանը Թուրինյան գործընթացի նոր փուլի ակտիվ մասնակիցն է․ ԿԳՄՍՆ
Հասարակություն
14.06.2023 | 13:49
ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանն այսօր ներկա է եղել «Թուրինյան գործընթաց․ դեպի ցկյանս ուսումնառություն» ազգային մեկնարկային հանդիպմանը․ տեղեկացնում են ՀՀ ԿԳՄՍՆ-ից։
Հայաստանը Թուրինյան գործընթացի նոր փուլի ակտիվ մասնակիցն է. գործընթացի մեկնարկը տվել է Եվրոպական կրթական հիմնադրամը (ԵԿՀ)՝ հատուկ ուշադրություն դարձնելով կրթական և ուսումնական համակարգերի ցկյանս հեռանկարների մշտադիտարկմանը և ցկյանս ուսումնառության հայեցակարգի փոփոխությանը։
ԿԳՄՍ նախարարի տեղակալ Արաքսիա Սվաջյանը շնորհակալություն է հայտնել եվրոպացի գործընկերներին՝ ի դեմս Եվրոպական կրթական հիմնադրամի, ցկյանս կրթության հայեցակարգի և ուսումնառության, գործող մեխանիզմների վերաբերյալ Հայաստանում իրականացրած մշտադիտարկման և ստացված արդյունքների համար:
«Մշտադիտարկման շնորհիվ հնարավորություն ունենք արձանագրելու բոլոր խնդիրներն ու ձեռքբերումները և դրանց հիման վրա սկսելու գործընթացի երկրորդ փուլը: Սա նաև հնարավորություն է հայեցակարգում անհրաժեշտ փոփոխություններ կատարելու և մեր քաղաքացիների ապահովելու ցկյանս ուսումնառության՝ առավել բարենպաստ պայմաններ»,- ասել է Արաքսիա Սվաջյանը:
Փոխնախարարը գործընթացի իրականացումը կարևորել է թե՛ ֆորմալ, թե՛ ոչ ֆորմալ կրթական ոլորտների համար՝ որպես հնարավորություն տարբեր մասնագիտություններ ունեցող մարդկանց կարողությունները զարգացնելու կամ կյանքի ցանկացած փուլում նոր մասնագիտություն ընտրելու և ներուժը երկրի տնտեսության զարգացմանն ուղղելու տեսանկյունից:
Աշխատաժողովին ողջույնի խոսքով հանդես են եկել նաև Համագործակցության բաժնի ղեկավար, Հայաստանում ԵՄ պատվիրակության ներկայացուցիչ Ֆրանկ Հեսսը, ԿԳՄՍՆ նախնական /արհեստագործական/ և միջին մասնագիտական կրթության վարչության պետ, Թուրինյան գործընթացի ազգային համակարգող Արմենուհի Պողոսյանը, ԵԿՀ Մարդկային կապիտալի զարգացման ավագ մասնագետ Միհայլո Միլովանովիչը:
Միջոցառման ընթացքում ներկայացվել և քննարկվել են Թուրինյան գործընթացի կողմից Հայաստանում ՄԿՈւ հայեցակարգի և դրա համակարգային առաջընթացի մշտադիտարկման արդյունքները։ Միջոցառումը դարձել է նաև Թուրինյան գործընթացի կողմից Հայաստանում ցկյանս ուսումնառության հայեցակարգի ուսումնասիրության և գործընթացի հետագա փուլերում Հայաստանը ներգրավելու մեկնարկ։
ԿԳՄՍՆ նախնական /արհեստագործական/ և միջին մասնագիտական կրթության վարչության պետ Արմենուհի Պողոսյանի խոսքով՝ Հայաստանը 2010 թվականից միացել է Թուրինյան գործընթացին. «Սա մեզ համար շատ կարևոր գործիք է, որի շնորհիվ կարողանում ենք վերլուծել ու գնահատել ՄԿՈՒ ոլորտում արձանագրված առաջընթացը և որի հիման վրա նախանշում ենք բոլոր բարեփոխումներն ու ծրագրերը: Թուրինյան գործընթացի նախորդ տարիների վերլուծական փաստաթղթերը և զեկույցները մեծապես նպաստել են «ՀՀ կրթության՝ մինչև 2030 թվականի զարգացման պետական ծրագրի» և գործողությունների պլանի մշակման գործընթացին, ինչպես նաև օգնել՝ հստակ գնահատելու, թե ինչ ունենք և ինչպես պետք է շարժվենք առաջ մեր նպատակների իրագործման համար»:
Արմենուհի Պողոսյանը կարևորել է Եվրոպական կրթական հիմնադրամի մշտական աջակցությունը Հայաստանում ՄԿՈՒ համակարգի զարգացմանը՝ իրականացնելով մի շարք ծրագրեր, որոնք ուղղված են թե՛ բովանդակության, թե՛ կառավարման բարելավմանը, թե՛ սոցիալական գործընկերության զարգացմանը, և թե՛ ՄԿՈՒ ոլորտում ինստիտուցիոնալ համակարգի ներդրմանը:
Հայաստանում ԵՄ պատվիրակության և Եվրոպական կրթական հիմնադրամի ներկայացուցչները բարձր են գնահատել Հայաստանի մասնակցությունը Թուրինյան գործընթացին՝ ընդգծելով, որ մեր երկրում ստեղծված են բավական լավ հնարավորություններ ՄԿՈՒ համակարգի գրավչության բարձրացման ու մարդկանց ներգրավվածության ապահովման համար:
