14.08.2026 | 20:08
Աշտարակի խճուղում մեքենայից գազային ատրճանակով օդ է կրակել․ 19-ամյա երիտասարդը հայտնաբերվել է. ՆԳՆ
Էրդողանը հայտարարել է, որ Կիպրոսի հարցով բանակցություններին վերադառնալու պայմանը «Թուրքական Կիպրոսի ճանաչումն է»
Քաղաքականություն
12.06.2023 | 21:52
Անկարան ապագայում էլ շարունակելու է վճռականորեն պաշտպանել ինչպես Թուրքիայի, այնպես էլ Հյուսիսային Կիպրոսի Թուրքական Հանրապետության շահերը Արևելյան Միջերկրական ծովում։ Այս մասին Հյուսիսային Կիպրոս այցի ընթացքում չճանաչված այդ երկրի ղեկավար Էրսին Թաթարի հետ համատեղ մամուլի ասուլիսում ասել է Թուրքիայի նախագահ Ռեջեփ Թայիփ Էրդողանը, գրում է Անադոլու գործակալությունը։
Էրդողանի խոսքով՝ թուրքերը Կիպրոսում «փոքրամասնություն չեն եղել և չեն լինի»։
«Նրանք, ովքեր անտեսում են այս իրողությունները, երազում են կղզու միասնական ինքնիշխանության մասին: Ես կոչ եմ անում նրանց ճանաչել Կիպրոսի իրողությունները»,- ասել է նա։
Էրդողանը նշել է, որ Կիպրոսի հարցով բանակցություններին վերադառնալու պայմանը Հյուսիսային Կիպրոսի ճանաչումն է։
«Կիպրոսում ավելի քան կես դար է կորել Կիպրոսի հունական համայնքի մաքսիմալիզմի և անզիջում դիրքորոշման պատճառով։ Ոչ ոք թույլ չի տա ևս 50 տարի կորցնել»,- ասել է Թուրքիայի նախագահը։
Նա նաև հայտարարել է, որ տարածաշրջանում Անկարայի քաղաքականությունը հիմնված է խաղաղության ձգտման վրա։
«Թուրքիայի ճանապարհային քարտեզը տարածաշրջանի համար պարզ է և կենտրոնացած է խաղաղության վրա: Մենք հանդես ենք գալիս Էգեյան ծովը խաղաղության ծովի վերածելու օգտին»,- ասել է Էրդողանը։
Էմմա Չոբանյան
