14.08.2026 | 19:40
Վանաձոր համայնքի տիրապետմանն է վերադարձվել Հրանտ Մաթևոսյանի անվան այգու տարածքում գտնվող ևս 1 հողատարածք
Մոսկվան դեմ չէ, որ այլ երկրներ ներգրավվեն ՀՀ-Ադրբեջան գործընթացում, սակայն եռակողմ հայտարարություններին համապատասխան․ ՌԴ ԱԳ փոխնախարար
Քաղաքականություն
09.06.2023 | 16:20
Ռուսաստանի Դաշնության ԱԳ փոխնախարար Միխայիլ Գալուզինը «Ռոսիա 24» հեռուստաալիքին տված հարցազրույցում ասել է, որ Մոսկվան հետևողականորեն աջակցում է Հայաստանին և Ադրբեջանին խաղաղության պայմանագրի չափանիշները մշակելու հարցում։
«Ռուսական կողմը շարունակում է ջանքերը լիովին համապատասխան եռակողմ հայտարարություններին՝ օգնելու լուծել հայ-ադրբեջանական հարաբերությունների կարգավորման հարցերի ամբողջ համալիրը, այդ թվում, իհարկե, խաղաղության պայմանագրի ստորագրման առաջմղումը»,- ասել է Գալուզինը։
Նա բնական ու տրամաբանական է անվանել գործընթացը, որ Բաքուն ու Երևանն ուղիղ են քննարկում խաղաղության պայմանագրի տեքստը՝ նշելով, որ « Հայաստանի, ՌԴ-ի և Ադրբեջանի առաջնորդների միջև եռակողմ պայմանավորվածությունները մնում են հայ-ադրբեջանական կարգավորման անվիճելի ճանապարհային քարտեզը»։
Գալուզինը նշել է, որ ԱՄՆ-ը փորձում է Կովկասից դուրս մղել Մոսկվային։ Նա ասել է, որ «Վաշինգտոնն ամենուր փորձում է հասնել նույն բանին. մի կողմից՝ դուրս մղել Ռուսաստանին, մյուս կողմից՝ հպատակեցնել անկախ պետություններին, որոնք Ռուսաստանի գործընկերներն ու դաշնակիցներն են, և խանգարել այդ գործընկերությանը»։
Գալուզինը նաև հավելել է, որ Ռուսաստանը դեմ չէ, որ այլ երկրներ նույնպես նպաստեն Հայաստանի և Ադրբեջանի հարաբերությունների կարգավորմանը, բայց «ոչ խոսքով, այլ գործով» և «եռակողմ հիմնարար հայտարարությունների հունով»։
Էմմա Չոբանյան
