Պատահե՞լ է՝ ռեստորանում նստած լինեք, հեռավոր անկյունում ծխեն․ Աղազարյանը՝ Թորոսյանին․ ՏԵՍԱՆՅՈՒԹ

ԱԺ տնտեսական հարցերի մշտական հանձնաժողովի՝ հունիսի 9-ի արտահերթ նիստում առաջին ընթերցմամբ քննարկվում է «ՀՀ հարկային օրենսգրքում փոփոխություններ կատարելու մասին» և «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» օրենքների նախագծերը։

Նշվեց, որ օրենսդրական փաթեթով առաջարկվում է ինդեքսավորումը յուրաքանչյուր տարվա համար սահմանել 8 տոկոս. ծխախոտային արտադրանքի դրույքաչափերը բարձրացնել յուրաքանչյուր տարի 10 տոկոսով, էլեկտրոնային ծխախոտների դեպքում 18 և ավելի տոկոսով, օղու և էթիլային սպիրտի ակցիզային հարկի դրույքաչափերը յուրաքանչյուր տարի բարձրացնել 10 տոկոսով:
Վարչական պատասխանատվություն է նախատեսվել ծխախոտի առավելագույն մանրածախ գնից բարձր գնով ծխախոտի արտադրանք վաճառելու դեպքերի համար: Տուգանքի չափը 300.000 դրամ է:

Նախագիծը ներկայացնելուց հետո պատասխանելով պատգամավոր ՔՊ խմբակցության պատգամավոր Արսեն Թորոսյանի հարցին՝ ինչո՞ւ առավել չի խստացվում հատկապես ծխախոտի արտադրանքի իրացումը, ՀՀ ֆինանսների նախարարի տեղակալ Արման Պողոսյանը նշել է, որ խստացումները հաճախ բացասական հետևանքների են բերում, ըստ նրա՝ բարձր գների դեպքում մարդիկ ավելի էժան և անորակ ծխախոտ են օգտագործում, ինչն առավել վնասակար է առողջությանը:

ՀՀ առողջապահության նախկին նախարար Արսեն Թորոսյանը կարծիք հայտնեց «Ակնհայտ է և ապացուցված, որ ծխախոտի գների բարձրացումը բերում է ծխողների թվի հստակ կրճատմանը»:

«Պատահե՞լ է՝ սրճարանում կամ ռեստորանում նստած լինեք, հեռավոր անկյունում ծխեն»,- դիմելով Արսեն Թորոսյանին՝ հետաքրքրվեց պատգամավոր Հովիկ Աղազարյանը։

«Ես նախ՝ աշխատաում եմ ռեստորաններում չլինել, երկրորդ՝ աշխատում ենք այնպես անել, որ համակարգային ձևով այդ երևույթը հնարավորինս քչանա, և իմ ինդիվիդուալ փորձառությունն այստեղ քիչ կարևոր է»։

Մանրամասները՝ տեսանյութում։