Քաղաքականություն
08.06.2023 | 20:52
Դոնալդ Թրամփի իշխանության տարիներին ԱՄՆ փոխնախագահի պաշտոնը զբաղեցրած Մայք Փենսը պաշտոնապես սկսեց իր նախընտրական քարոզարշավը՝ ամերիկացիներին խոստանալով «նոր ղեկավարություն»։
«Ամերիկայի ձայնը» տեղեկացնում է, որ Այովա նահանգից հղած տեսաուղերձի միջոցով նախկին փոխնախագահը հայտարարել է՝ «նոր ժամանակները պահանջում են նոր ղեկավարություն»։
«Այսօր մեր երկրին և մեր կուսակցությանը հարկավոր է առաջնորդ, ով, ինչպես նախագահ Լինքոլնն է ասել, ցուցադրում է իր լավագույն որակները»,- ասել է Փենսը։
Ավելի վաղ՝ նախկին փոխնախագահը ԱՄՆ Դաշնային ընտրական հանձնաժողով էր ներկայացրել 2024թ․ նախագահական ընտրություններում թեկնածու առաջադրվելու մասին իր հայտարարությունը։ Այն անհրաժեշտ փաստաթուղթ է՝ ընտրություններին առաջադրվելու համար։
Ինդիանայի նախկին նահանգապետ և հավատարիմ պահպանողական Փենսը ծրագրում է մեծ քարոզարշավ անցկացնել Այովայում, ուր նրա պահպանողական մոտեցումները բազամթիվ հարցերի շուրջ, ներառյալ՝ աբորտի արգելման վերաբերյալ, կարող են օգնել նրան շահել պահպանողական ընտրողների, այդ թվում՝ ավետարանականների ձայները:
Փենսի խորհրդականները կարծում են, որ Այովա նահանգում Հանրապետական կուսակցության բավականաչափ անդամներ կան, որոնք կաջակցեն նրան։
Նախկին փոխնախագահի միանալը Սպիտակ տուն տանող մրցավազքին նշանակում է, որ նախկին նախագահ Դոնալդ Թրամփն ունենալու է ևս մեկ մրցակից։ Թրամփի հարաբերությունները Փենսի հետ վատացան 2021 թվականի հունվարի 6-ի հայտնի իրադարձություններից հետո, երբ նախկին նախագահի կողմնակիցները ներխուժեցին Կապիտոլիում:
Մայք Փենսը սուր քննադատության ենթարկեց և հրաժարվեց աջակցել Դոնալդ Թրամփին, երբ վերջինս փորձում էր հասնել 2020 թվականի նախագահական ընտրությունների արդյունքների չեղարկմանը, որոնց համաձայն՝ հաղթանակ էր տարել Ջո Բայդենը։
