14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Օրը 3 անգամ գալիս, ասում են՝ հավաքեք, 1-2 ժամ հետո նորից փռում ենք․ փողոցային առևտրի չլուծվող խնդիրը. ՏԵՍԱՆՅՈՒԹ
Հասարակություն
07.06.2023 | 18:43
Երևանի քաղաքային իշխանություններին տարիներ շարունակ այդպես էլ չի հաջողվում արմատախիլ անել փողոցային առևտուրը, թեև հիմա անգամ ապրանքն առգրավելու իրավունք ունեն։
Մայրաքաղաքի հատկապես կենտրոնական փողոցներում այսօր էլ հաճախ կարելի է հանդիպել տարբեր ապրանքներ վաճառողների։ Առևտրականներն այսօր Factor TV-ի հետ զրույցում խոստովանեցին՝ թեև քաղաքապետարանի աշխատակիցները պահանջում են մթերքը հավաքել կամ առգրավում են, բայց իրենց այլ ելք չունեն, ստիպված նրանց հեռանալուց հետո նորից վաճառում են։
«15 տարի փողոցում առևտուր եմ անում, համամիտ եմ պետության հետ, որ տգեղ է, բայց ոչ մեկս աշխատատեղ ու աշխատանք չունենք, այսպես մեր գումարն ենք վաստակում: Թշնամուս անգամ չեմ ցանկանա, որ կանգնի, փողոցում առևտուր անի։ Հասկանում ենք՝ սիրուն չէ, մեր քաղաքն է, բայց ապրելու այլ տարբերակ չունենք։ Ռուսներն էլ գալիս ասում են՝ ինչ սիրուն են ձեր մրգերը, համեղ են, հյուրասիրում ենք»,- ասում է առևտրականներից մեկը։
Քաղաքային իշխանության հորդորներին, որ կարող են շուկայում վաճառել, առևտրականները պատասխանում են՝ շուկայում վարձավճարը թանկ է, բացի այդ, այնտեղ գրեթե չի վաճառվում՝ փորձել են, գիտեն։ Հետո էլ այստեղ հաճախորդներ ունեն, ինչպե՞ս հեռանան։
«Վերջին անգամ՝ շուրջ 20 օր առաջ 40 հազար դրամի ելակ տարան, դե ինչ անեմ։ Ամեն օր էլ գալիս, ստուգում են, իրենց աշխատանքն է, հասկանում ենք։ Օրը 3 անգամ գալիս, ասում են՝ հավաքեք, 1-2 ժամ սպասում ենք, հետո նորից փռում ենք․ այլ ելք չկա»,- ընդգծում է առևտրականը։
Առևտրականներն ասում են՝ սեփական բերքն են մշակում ու վաճառում։ Տուգանքներն էլ վճարելու միջոցներ չունեն։
«Երեք օր առաջ ելակն ու կեռասն առգրավեցին, ճար չկա, ո՞նց անենք»,- ասում է մեկ այլ առևտրական։
Մանրամասները՝ տեսանյութում։
Արփի Հակոբյան
