Թուրքիան պատրաստ է աջակցել Կախովկա ՀԷԿ-ի հարցով միջազգային հանձնաժողովի ստեղծմանը․ Էրդողանը՝ Զելենսկիին

Թուրքիայի նախագահ Ռեջեփ Թայիփ Էրդողանն Ուկրաինայի նախագահ Վլադիմիր Զելենսկիի հետ հեռախոսազրույցում  հայտարարել է Կախովկա ՀԷԿ-ում պայթյունի պատճառները հետաքննող միջազգային հանձնաժողով ստեղծելու հնարավորության մասին, գրում է Անադոլու գործակալությունը։

Թուրքիայի նախագահականի հաղորդմամբ՝ հեռախոսազրույցում Էրդողանն ընդգծել է թուրքական կողմի պատրաստակամությունը՝ ներդրում ունենալ Կախովկայի ամբարտակի մասով միջազգային հանձնաժողովի ստեղծման նախաձեռնության մեջ։

Էրդողանի խոսքով՝ հանձնաժողովի կազմում կարող են ներգրավվել մասնագետներ հակամարտող կողմերից, ինչպես նաև միջազգային հանրությունից, այդ թվում՝ ՄԱԿ-ից և Թուրքիայից։ Նա նշել է, որ այդ հարցում հնարավոր է հետևել երկխոսության այնպիսի մեթոդի, ինչպիսին տեղի է ունեցել հացահատիկի  գործարքի պարագայում։ Թուրքիայի նախագահն ընդգծել է, որ ռազմական գործողությունների շարունակման ֆոնին անհնար է կանխել մարդկային զոհերը, ուստի շատ կարևոր է կենտրոնանալ բանակցային գործընթացի վերսկսման հարցի վրա։ Նա վստահեցրել է, որ Անկարան կշարունակի վճռական ջանքեր գործադրել արդարացի խաղաղության մոտեցման համար։

Հիշեցնենք, որ Կախովկա ՀԷԿ-ը, որն արդեն մեկ տարուց ավելի վերահսկում են ռուս զինվորականները, երեկ վաղ առավոտյան ավերվել է։ Դնեպրից ջրի անվերահսկելի արտահոսք է տեղի ունենում։ Նախօրեին Կիևը հայտարարել էր, որ ռուսական զորքերն են պայթեցրել ՀԷԿ-ի ամբարտակը։ ՌԴ-ն հերքում է՝ փոխարենը տեղի ունեցածում մեղադրելով ուկրաինական կողմին։

Էմմա Չոբանյան