15.05.2024 | 23:54
25 հեկտար հողերը կվերադարձվեն Կիրանցին, ճանապարհի տեղափոխման խնդիր կա. վարչապետի աշխատակազմ
Դատավորը մերժել է Սերժ Սարգսյանի ենթադրյալ ապօրինի ծագում ունեցող գույքի բռնագանձման գործով իրեն ներկայացված բացարկի միջնորդությունը
Հասարակություն
06.06.2023 | 18:22
Հակակոռուպցիոն դատարանի դատավոր Կարապետ Բադալյանը մերժել է Սերժ Սարգսյանի փաստաբան Ամրամ Մակինյանի կողմից իրեն ներկայացված բացարկի միջնորդությունը։
Հիշեցնենք, որ այսօր Սարգսյանի պաշտպան Ամրամ Մակինյանը բացարկի միջնորդություն էր ներկայացրել դատավոր Կարապետ Բադալյանին։
Փաստաբանը նշել էր, որ Կարապետ Բադալյանի կինը Նիկոլ Փաշինյանի քաղաքական թիմի անդամ Արսեն Խառատյանի հարազատ քույրն է։ Ըստ բաց աղբյուրներում առկա տեղեկատվության՝ Արսեն Խառատյանը 2008 թվականին մեկնել է Հայաստանից և վերադարձել 2018 թվականին։ Արսեն Խառատյանի՝ Հայաստանից մեկնելը կապվել է 2008 թվականի մարտի 1-ից հետո իշխանությունների դեմ ուղղված քաղաքացիական պայքարի ակտիվիստ լինելու հետ։
«Այսինքն՝ Արսեն Խառատյանն իր՝ Հայաստանից մեկնելը պայմանավորել է Հայաստանի այդ ժամանակվա իշխանություններով, և որպես Արսեն Խառատյանի կնոջ ամուսին՝ Կարապետ Բադալյանը չէր կարող չիմանալ Արսեն Խառատյանի նման ընկալումների մասին և չէր կարող բացասաբար չտրամադրվել այդ ժամանակվա իշխանությունների, մասնավորապես՝ 2008 թվականի փետրվարին Հայաստանի նախագահ ընտրված, այս գործով պատասխանող Սերժ Սարգսյանի նկատմամբ»,-այս և այլ փաստարկներ ներկայացնելով՝ պաշտպանը կասկածի տակ էր դրել Սարգսյանի և վերջինիս հարազատների ենթադրյալ ապօրինի ծագում ունեցող գույքի բռնագանձման գործը քննող դատավոր Բադալյանի անաչառությունը:
Արաքս Մամուլյան
