06.06.2026 | 14:39
«Հանրապետություն» կուսակցությունը դեռևս որոշում չունի՝ կդիմի վարչական դատարան, թե՝ ոչ. հայտնում են, որ եռօրյա ժամկետ ունեն
ՌԴ-ն զանգվածային էկոլոգիական ոչնչացման ռումբ է գործի դրել․ Զելենսկի
Քաղաքականություն
06.06.2023 | 17:05
Ուկրաինայի նախագահ Վլադիմիր Զելենսկին, ելույթ ունենալով Բուխարեստի իննյակի գագաթնաժողովում (միավորում է Կենտրոնական և Արևելյան Եվրոպայի ՆԱՏՕ-ի երկրները), Ռուսաստանին մեղադրել է Կախովկա հիդրոէլեկտրակայանի ականապատման և պայթեցման մեջ, գրում է BBC-ի ռուսական ծառայությունը։
«Ցավոք, մեկ տարուց ավելի է, ինչ Ռուսաստանը վերահսկում է և՛ ամբարտակը,և ՛ Կախովկա ՀԷԿ-ը։ Պայթեցնել այն դրսից հրետակոծությամբ՝ ֆիզիկապես անհնար է։ Այն ականապատված էր։ Այն ականապատվել ու պայթեցվել է ռուս զավթիչների կողմից։ Ռուսաստանը պայթեցրել է զանգվածային էկոլոգիական ոչնչացման ռումբ։ Սա Եվրոպայում տասնամյակների ընթացքում ամենամեծ տեխնածին բնապահպանական աղետն է»,- ասել է Զելենսկին։
Հավելենք, որ ուկրաինական կողմի հաղորդմամբ՝ ռուսական զորքերը վաղ առավոտյան պայթեցրել են Կախովկա ՀԷԿ-ի ամբարտակը։ ՌԴ-ն հերքում է այս լուրերը։ Մասնավորապես, ՌԴ նախագահի մամուլի խոսնակ Դմիտրի Պեսկովը ՀԷԿ-ի փլուզումն անվանել է Ուկրաինայի կողմից դիվերսիայի արդյունք։
«Մենք արդեն կարող ենք միանշանակ հայտարարել, որ խոսքն ուկրաինական կողմի կանխամտածված դիվերսիայի մասին է։ Այս դիվերսիան կարող է հանգեցնել շատ լուրջ հետևանքների տարածաշրջանի մի քանի տասնյակ հազար բնակիչների համար, բնապահպանական հետևանքներ, այլ բնույթի հետևանքներ»,- ասել է Պեսկովը։
Նա նշել է, թե «տեղի ունեցած դիվերսիաները կապված են Ուկրաինայի զինված ուժերի «անհաջող հարձակման» հետ»։
Էմմա Չոբանյան
