Պետք է էականորեն ավելացնել ԱԳՆ բյուջեն․ Արսենյանը հորդորում է չխնայել․ ՏԵՍԱՆՅՈՒԹ

«2024 թվականին ԱԳՆ պետբյուջեն պետք է էականորեն մեծացած լինի և չպետք է առաջնորդվի բազայինից: Չեմ կարծում, որ մենք պետք է այդտեղ խնայողության գնանք և հետո էլ ասենք, որ մենք մեր գործունեության մեջ տնտեսել ենք այսքանը: Այս մասին այսօր՝ հունիսի 5-ին, ԱԺ արտաքին հարաբերությունների և ֆինանսավարկային ու բյուջետային հարցերի մշտական հանձնաժողովների համատեղ նիստում ԱԳՆ-ի «ՀՀ 2022 թ. պետական բյուջեի կատարման մասին» տարեկան հաշվետվության քննարկմանը, դիմելով ԱԳ նախարար Արարատ Միրզոյանին, ասաց «Քաղաքացիական պայմանագիր» խմբակցության պատգամավոր Գուրգեն Արսենյանը:

«ԱԳՆ-ի, ՊՆ-ի պարագայում այդ տնտեսումը ոչ մի գործնական բան չի տալու, ընդհակառակը՝ պետք է էականորեն ավելացնել ներկայացուցչությունները, ծախսերը, դիվանագետների քանակը այն երկրներում, որոնք ներգրավված չեն այս պրոցեսում. այս պրոցեսների ավարտից հետո մենք 0-ից չենք կառուցելու այն հարթակը, որը պետք է ապահովի մեր կյանքի սիներգիան: Հիմա պետք է ցանենք, որ հետո կարողանանք հնձել»,- հավելեց պատգամավորը:

«Երբ ես ասում էի, որ փոխարժեքի պատճառով մենք տնտեսում ենք ունեցել, ես դա որպես արդարացում էի նշում,- պատասխանեց Միրզոյանը։ – Ի դեպ, հիմա աֆրիկյան մայրցամաքում ներկայացուցիչ ունենք ոչ միայն Եգիպտոսում, այլ նաև Եթովպիայում:

Եվ հիմա լրջորեն մտածում ենք ներկայացուցչություններ հիմնել նաև Քենիայում և Հարավաֆրիկյան Հանրապետությունում, բայց սա դեռ թղթին հանձնված չէ, ֆինանսների նախարարության, կառավարության հետ համաձայնեցված չէ: Սա բնականոն գործընթաց է, և փորձում ենք ընդլայնել աշխարհագրությունը»:

Մանրամասները՝ տեսանյութում։