Ինչու է Փաշինյանը բարևել ծայրահեղական Իմամին․ Գեղամ Մանուկյանը՝ Արարատ Միրզոյանին․ ՏԵՍԱՆՅՈՒԹ

«Թուրքիայում հայտնի «Սուլեյման Աղա» աղանդի իմամներից մեկն է՝ Ադենշեներ, ծայրահեղական հայացքների և բազմաթիվ սկանդալների մեջ հայտնի։ Երկու օր առաջ Թուրքիայում Էրդողանի երդման արարողությանը Նիկոլ Փաշինյանը նրան բարևել է։ Եվ այդ ամենը թուրքական թվիթերյան տարածքում բավականին ծաղրալի արձագանքի արժանացել»,- ԱԺ մշտական հանձնաժողովների համատեղ նիստում հայտարարեց «Հայաստան» խմբակցության պատգամավոր Գեղամ Մանուկյանը՝ ցուցադրելով լուսանկար, որտեղ Նիկոլ Փաշինյանը և Ադենշեները միմյանց ողջունում են ձեռքսեղմումով։

«Ուզում եմ հասկանալ` ո՞ր մի անուղեղն է խորհուրդ տվել երդման արարողության ժամանակ, նույնիսկ Թուրքիայում ոչ միանշանակ ընդունված իմամին բարևել»,- հարցրեց Մանուկյանը՝ դիմելով ՀՀ արտգործնախարար Արարատ Միրզոյանին։

Արտգործնախարարը պատասխանեց․ «Թուրքիայի նախագահի երդման արարողությանը, ենթադրում եմ, հրավիրել են արտասահմանյան հյուրերի և հյուրերի Թուրքիայից, որոնց թվում նաև Հայաստանի վարչապետն է։
Ինչ-որ պահի մարդիկ շփվում են, բարևում են իրար։ Այդտեղ այդքան օպերատիվ հասցնել բոլոր հյուրերի մասին տեղեկացնել, բոլորի ինքնակենսագրականներով, հայացքներով և գործունեության տարբեր ասպեկտներով, մի քիչ իրատեսական չէ, կարծում եմ»,- ասաց Միրզոյանը՝ հավելելով, որ դա սովորական բարև էր, որին քաղաքական տեսանկյունից պետք չէ նայել։

«Եթե երկու մարդ իրար մոտենում, բարևում են, մի քիչ դժվար է պատկերացնել, ոնց էդ սխեման աշխատացնել, որպեսզի անգիր իմանաս բոլորին։ Ընդամենը բարևի մասին է խոսքը, ես չգիտեմ ինչ քաղաքական բաներ եք բխեցնում»։

Մանրամասները՝ տեսանյութում։