Քաղաքականություն
01.06.2023 | 17:57
Վրաստանի վարչապետ Իրակլի Ղարիբաշվիլին Քիշնևում Եվրոպական քաղաքական համայնքի գագաթնաժողովի շրջանակում լրագրողների հետ զրույցում ասել է, որ Թբիլիսին աջակցում է Հայաստանի և Ադրբեջանի միջև խաղաղության երկխոսությանն ու բանակցություններին, փոխանցում է agenda.ge-ն։
Նա նշել է, որ Թբիլիսիի միջնորդի դերը «շատ չեզոք և անկողմնակալ» է՝ Հարավային Կովկասի տարածաշրջանում «կայունությունն ու խաղաղությունն ամրապնդելու» համար:
«Մենք շատ լավ հարաբերություններ ունենք Հայաստանի և Ադրբեջանի հետ։ Սկզբունքորեն, Վրաստանը կատարել է շատ կարևոր և, ըստ էության, առաջին հաջող միջնորդությունը 2021 թվականին Ադրբեջանի և Հայաստանի միջև զինված հակամարտությունից հետո։ Մենք աջակցում ենք խաղաղության երկխոսությանն ու բանակցություններին երկու երկրների միջև։ Ես հավատում եմ, որ դա մեր տարածաշրջանի շահերից է բխում»,- ասել է Ղարիբաշվիլին։
Հավելենք, որ այսօր Քիշնևում սպասվում է հնգակողմ հանդիպում Հայաստանի և Ադրբեջանի ղեկավարների, Ֆրանսիայի նախագահի, Գերմանիայի կանցլերի և Եվրոպական խորհրդի նախագահի մասնակցությամբ։
Էմմա Չոբանյան
