Զաքիր Հասանովը հանձնարարել է շարունակել Արցախի ՊԲ-ի մոնիթորինգը և խոսել է Բաքվի կողմից ձեռք բերվելիք նոր զինատեսակների մասին

Ադրբեջանի պաշտպանության նախարար Զաքիր Հասանովն ամփոփել է ադրբեջանական բանակի ուսումնամարզական կենտրոնում օպերատիվ, մոտոհրաձգային, մեքենայացված ստորաբաժանումների հրամանատարների և նրանց տեղակալների հետ անցկացրած ուսումնամեթոդական հավաքների արդյունքները, որոնք անցկացվել են Ռազմական կառավարման ինստիտուտի ռազմական խաղերի կենտրոնում՝ 2023 թվականի ուսումնական պլանի համաձայն։

Ադրբեջանի ՊՆ-ն հաղորդում է, որ վերլուծվել է նաև իրավիճակը Հայաստան-Ադրբեջան սահմանին, ինչպես նաև Արցախում։ Քննարկելվել են, իբր, Արցախի ՊԲ-ի կողմից ադրբեջանի դիրքերի մոտ ամրություններ ստեղծելու փորձերը։ Հասանովը հատուկ հանձնարարականներ է տվել՝ շարունակել «Արցախի ՊԲ-ի գործունեության անխափան դիտարկումը», ինչպես նաև «մշտապես պատրաստ լինել՝ անհապաղ և վճռականորեն կանխելու ցանկացած հնարավոր սադրանք»։

Բացի այդ, Հասանովը նշել է, որ Ադրբեջանը կշարունակի ձեռք բերել ժամանակակից զինատեսակներ և ռազմական տեխնիկա։ Նա ասել է, որ երկրի պաշտպանունակության ամրապնդման և ազգային անվտանգության միջոցառումների ամրապնդման համար 1,105 միլիարդ մանաթի հատկացումը, ներառյալ՝ 1 միլիարդ մանաթը հատուկ պաշտպանական նպատակներով նախագծերի և գործողությունների ծախսերի համար, թույլ կտա ձեռք բերել նոր ժամանակակից սպառազինություն և ռազմական տեխնիկա բանակում ընթացող բարեփոխումների շրջանակում։

Հավելենք, որ Ադրբեջանի կառավարությունը նախատեսում է ավելացնել պաշտպանական ծախսերը՝ պետբյուջեից հատկացնելով հավելյալ 1 միլիարդ 105 միլիոն մանաթ (650 միլիոն դոլար)՝ երկրի պաշտպանունակության և ազգային անվտանգության ամրապնդման համար։

Էմմա Չոբանյան