Ո՞ր դեպքերում հարկ վճարողի միասնական հաշվից կարող է գումար փոխանցվել այլ հաշվի․ նոր կարգավորում․ ՏԵՍԱՆՅՈՒԹ

ՊԵԿ-ը Հարկային օրենսգրքում փոփոխություններ և լրացումներ է կատարել, որը նպատակ ունի կարգավորելու, թե հարկ վճարողի միասնական հաշվից ո՛ր դեպքերում կարող է իր հարկային մարմնում նշված բանկային հաշվից տարբերվող հաշվին գումար փոխանցվել: Այս մասին այսօր Կառավարության նիստում հայտարարեց ՊԵԿ նախագահ Ռուստամ Բադասյանը:

«Հիմա ենթաօրենսդրական ակտով կարգավորում ենք այդ դեպքերը, մասնավորապես՝ նախկինում, Հարկային օրենսգրքի կարգավորման համաձայն, հարկ վճարողը կարող էր բանկային ցանկացած այլ բանկային հաշիվ նշեր, որպեսզի միասնական հաշվից գումարի փոխանցումը կատարվեր, և դա բերել էր խարդախության մի շարք դեպքերի, երբ որոշակի փաստաթղթերի կեղծման արդյունքում գումարը փոխանցվում էր իրավաբանական անձի աշխատակցի կողմից այլ հաշիվների, և, ըստ էության, թե՛ պետությանն էր վնաս պատճառում, թե՛ տվյալ իրավաբանական անձին:

Հիմա փոփոխությունը կատարել ենք, թե ո՛ր դեպքերում հարկ վճարողն իրավունք ունի հարկային մարմին ներկայացրած իր բանկային հաշվից տարբերվող այլ հաշվի փոխանցել. դա վերակազմակերպման դեպքերն են, երբ իրավահաջորդի բանկային հաշվին կարող է փոխանցվել լուծարման դեպքում՝ կազմակերպության մասնակիցների, անհատ ձեռնարկատիրոջ և նոտարի դեպքում իրենց կարգավիճակը կորցնելուց հետո որպես ֆիզիկական անձ՝ իրենց հաշիվներին, և պետական ոչ առևտրային և համայնքային ոչ առևտրային կազմակերպությունների դեպքում՝ գանձապետական հաշիվներին»,- նշեց Բադասյանը:

ՊԵԿ նախագահը նաև տեղեկացրեց, որ ուժի մեջ մտնելու որոշակի ժամկետ է սահմանվել, որպեսզի վեբծառայություն գործի, արդյունքում` ԿԲ-ի և Ֆինանսների նախարարության միջոցով կհավաստիանան, որ այն հաշիվը, որը ներկայացնում է հարկ վճարողը, պատկանում է այն անձին, որ օրենքի նոր կարգավորումների համաձայն` իրավունք ունի ստանալու այդ գումարը:

Մանրամասները՝ տեսանյութում։