16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
ԵՄ-ն զբաղվում է ենթակառուցվածքների նախապատրաստմամբ՝ Ադրբեջանից գազի հավելյալ ծավալներ ստանալու համար
Քաղաքականություն
31.05.2023 | 23:02
ԵՄ-ն ողջունում է Հարավային գազային միջանցքի ընդլայնումը և նախապատրաստում է ենթակառուցվածքները՝ Ադրբեջանից գազի լրացուցիչ մատակարարումների համար։ Ադրբեջանական լրատվամիջոցների հաղորդմամբ՝ այս մասին հայտարարել է Եվրահանձնաժողովի ներկայացուցիչ Քրիստինա Լոբիլլո Բորերոն Բաքվում էներգետիկ շաբաթվա միջոցառումներին ունեցած ելույթում։
Բորերոն նշել է, որ 2022 թվականին ԵՄ-ն մի շարք միջոցներ է ձեռնարկել էներգետիկ ճգնաժամը հաղթահարելու համար՝ փորձելով դիվերսիֆիկացնել գազի մատակարարման ուղիներն ու աղբյուրները։
«Այս առումով մենք ողջունում ենք Հարավային գազային միջանցքի ընդլայնումը՝ 2027 թվականին մեր գազի առևտուրը կրկնապատկելու համար»,- ընդգծել է Բորերոն՝ նշելով, որ Եվրոպան նախապատրաստում է ենթակառուցվածքը մինչև 2027 թվականն Ադրբեջանից գազի լրացուցիչ մատակարարումների համար։
Եվրահանձնաժողովի ներկայացուցիչը նաև նշել է, որ նախորդ տարի Ադրբեջանը, 2021 թվականի համեմատ, ավելացրել է գազի մատակարարումները Եվրոպա շուրջ 40 տոկոսով։
2021 թվականին Ադրբեջանից գազի մատակարարումների ծավալը գերազանցել է 8 միլիարդ խորանարդ մետրը, 2023 թվականին այն կկազմի մոտավորապես 12 միլիարդ խորանարդ մետր։ Մինչև 2027 թվականը մատակարարումների ծավալը Բաքուն ցանկանում է հասցնել տարեկան առնվազն 20 միլիարդ խորանարդ մետրի։
Ներկայում Եվրոպայում ադրբեջանական գազը գնում են Իտալիան, Հունաստանը, Բուլղարիան, Ռումինիան։
Էմմա Չոբանյան
