ՀՀ-ն ընտրել է ժողովրդավարության մի ուղի, որը նշանակում է մարդու իրավունքների պաշտպանություն. ԵՄ դեսպան․ ՏԵՍԱՆՅՈՒԹ

Հայաստանը ընտրել է ժողովրդավարության մի ուղի, որը նշանակում է նաև մարդու իրավունքների պաշտպանություն․ սա կարևոր է։ Այս մասին, այսօր՝ մայիսի 31-ին, Երևանում ընթացող Ժողովրդավարության հայկական ֆորումի ժամանակ նշեց Հայաստանում ԵՄ գրասենյակի ղեկավար, դեսպան Անդրեա Վիկտորինը՝ հավելելով, որ սա շարունակական գործընթաց պետք է լինի։

«Հաշվի առնելով այն դժվար, անվտանգային իրավիճակը, որ գտնվում է Հայաստանը, անհրաժեշտ է, որ այստեղ բնակչությունը լինի դիմադրողունակ, և մենք աջակցում ենք այն տարածաշրջաններին, որտեղ տեսնում ենք անվտանգության մարտահրավերներ»,- ասաց դեսպանը՝ բերելով Սյունիքի օրինակը:

Նա խոսեց նաև մամուլի ազատությունից՝ ընդգծելով «Լրատվամիջոցները պահապաններն են անկախության, նրանց պետք է պաշտպանել և բավարար չէ ասել, որ համացանցն ազատ է: Պետք է դիտարկել յուրաքանչյուր դեպք և յուրաքանչյուրը առանձին քննարկել: Այո, եթե լրագրողներն ապատեղեկատվություն են տարածում, դրան պետք է անդրադառնալ, սակայն ընդհանուր առմամբ, պետք է ասել, որ ԶԼՄ-ներն են անդրադառնում որոշակի հարցերի և մենք պետք է հետաքննող լրագրություն ունենանք: Ես կուզենայի դա մատնանշել որպես շարունակական հանձնառություն լրագրությունը պաշտպանելու տեսակետից և բարելավել լրագրության դիրքերը Հայաստանում: Շատերն են շփոթում փաստերն ու մեկնաբանությունները, դրանք պետք է տարանջատել»։

Վիկտորինը նաև կարևորեց ներառականությունը. «Դա նշանակում է իսկապես թիրախավորել բոլոր խոցելի խմբերին, լինի հաշմանդամություն ունեցող անձինք, լինեն ԼԳՏԲ համայնքը: Կան դեպքեր, որոնք ինձ համար շոկային էին. ես ակնկալում եմ, որ մի կողմից քաղհասարակությունը պաշտպանի և ասի՝ չպետք է այսպես լինի, որ մարդիկ պետք է ունենան անվտանգ ապրել երկրում: Սակայն նաև ցանկանում եմ, որ պետությունն էլ ասի, որ սա չպետք է տեղի ունենա մեր երկրում, որ մենք կարողանանք այս մարդկանց իրավունքները պաշտպանել»։

ԵՄ դեսպանը կրևորեց նաև կանանց ներգրավվածությունը կառավարությունում, նաև խաղաղության գործընթացներում. «Վստահ եմ, որ կանայք կարող են խաղաղության և կայունության համար գտնել հարատև լուծումներ: Կանանց ավելի մեծ ներկայացվածություն եմ ուզում տեսնել»:

Մանրամասները՝ տեսանյութում։