Քաղաքականություն
30.05.2023 | 13:41
«Կարծում եմ, որ Երկրորդ համաշխարհային պատերազմից հետո սա, հավանաբար, մարտահրավերներով լի ժամանակ է, չնայած այն հանգամանքին, որ մենք շատ դժվար օրեր ունեցանք 2008 թվականին»,- ասել է Վրաստանի վարչապետ Իրակլի Ղարիբաշվիլին Բրատիսլավայում Գլոբալ անվտանգության ֆորումում։
«Ուզում եմ բոլորին հիշեցնել, որ առաջին պատերազմը Վրաստանում էր։ Այսօր ինչ-որ մեկը, գուցե, մոռացել է, որ Վրաստանի՝ մեր տարածքի 20%-ն օկուպացված է Ռուսաստանի կողմից, իսկ 2008-ի պատերազմից հետո Ռուսաստանը չլքեց մեր տարածքը, հակառակը, մնաց մեր հողի վրա, մեր տարածքում, նրանք երկու ռազմաբազա են կառուցել, և սա ավերիչ պատերազմի հետևանք է»,- ասել է Ղարիբաշվիլին։
Հարցին՝ արդյո՞ք եղել է չհրահրված ագրեսիա, Ղարիբաշվիլին պատասխանել է. «Ես չեմ ուզում մանրամասների մասին խոսել, խոսել այս հարցի մասին, քանի որ մենք մեր կարծիքն ունենք։ Եթե մեր իշխանությունն այն ժամանակ լիներ, մենք ամեն ինչ կանեինք այս պատերազմից խուսափելու համար։ Վրաստանը փոքր երկիր է՝ ընդամենը 4 միլիոն բնակչով։ Այն լավ բանակ ունի, բայց դեռ փոքր երկիր է։ Ուստի կարծում եմ, որ սա պետք է բխի ցանկացած իշխանության շահերից, հատկապես, երբ փոքր երկիրը Եվրամիության կամ ՆԱՏՕ-ի անդամ չէ, երբ չունի անվտանգության երաշխիքներ։ Բայց այդ պատերազմը, չեմ ուզում մանրամասնել, կործանարար էր մեզ համար։ Արդյունքում մեր տարածքի 20%-ն օկուպացված է Ռուսաստանի կողմից»։
Տաթև Ֆռանգյան
