Շվեդիա և F-16-եր․ Ջո Բայդենը հայտնել է, թե ինչ հարցեր են քննարկել Էրդողանի հետ հեռախոսազրույցում

ԱՄՆ նախագահ Ջո Բայդենը հայտնել է, որ Թուրքիայի նախագահ Ռեջեփ Թայիփ Էրդողանը նախօրեին կայացած հեռախոսազրույցում կրկնել է ԱՄՆ-ից F-16 կործանիչներ գնելու՝ Անկարայի ցանկությունը, մինչդեռ Բայդենը նրան ասել է, որ Վաշինգտոնը ցանկանում է, որ Անկարան հրաժարվի ՆԱՏՕ-ին Շվեդիայի անդամակցության դեմ առարկությունից, գրում է Reuters-ը:

«Ես խոսեցի Էրդողանի  հետ, շնորհավորեցի։ Նա դեռ ցանկանում է աշխատել F-16-երի ուղղությամբ: Ես ասացի նրան, որ մենք ցանկանում ենք գործարք կնքել Շվեդիայի հետ, ուստի եկեք դա ավարտենք: Մենք կապի մեջ կլինենք»,- ասել է Բայդենը լրագրողներին Սպիտակ տնից Դելավեր մեկնելուց առաջ։

Հարցին՝ արդյո՞ք նա Էրդողանից որևէ շարժ ակնկալում էր ՆԱՏՕ-ին Շվեդիայի անդամակցելու հարցում, Բայդենն ասել է․ «Ես այդ հարցը բարձրացրել եմ։ Մենք պատրաստվում ենք ավելի մանրամասն խոսել այդ մասին հաջորդ շաբաթ»։

Քննարկումներին ծանոթ աղբյուրը լրատվամիջոցին հայտնել է, որ ԱՄՆ-ն ավելի վաղ Թուրքիային ասել է, որ դժվար կլինի Կոնգրեսին ստիպել հաստատել F-16-ի գործարքը, եթե Անկարան կանաչ լույս չվառի Շվեդիայի՝ ՆԱՏՕ-ին անդամակցության հարցում։

Թուրքիան մարտի վերջին վավերացրել էր Ֆինլանդիայի անդամակցության հայտը, սակայն Շվեդիայի դեպքում շարունակում է առարկել։

Սպիտակ տան տարածած հաղորդագրության մեջ էլ նշվում է, որ երկու երկրների ղեկավարները հայտնել են իրենց համատեղ հանձնառությունը՝ շարունակելու համագործակցությունը որպես սերտ գործընկերներ՝ երկրների և ժողովուրդների միջև համագործակցությունը խորացնելու համար։

«Նրանք նաև քննարկել են իրենց պատրաստակամությունը որպես ՆԱՏՕ-ի դաշնակիցներ՝ լուծելու տարածաշրջանային և գլոբալ մարտահրավերները, ներառյալ՝ անդրատլանտյան անվտանգության ամրապնդումը Վիլնյուսում ՆԱՏՕ-ի գագաթնաժողովում»,- ասվում է հաղորդագրության մեջ։

Էմմա Չոբանյան