Ադրբեջանը լուրջ բախումներ է հրահրելու, և ԼՂ-ն դիմադրելու է․ պիտի՛ պատրաստվենք այդ օրվան՝ բոլոր ռեսուրսներով․ Արմինե Մարգարյան․ ՏԵՍԱՆՅՈՒԹ

Վարչապետ Նիկոլ Փաշինյանն այսօր հաստատեց, որ Քիշնևում Եվրոպական քաղաքական համայնքի գագաթնաժողովի շրջանակում տեղի ունենալու է իր, Ալիևի, Մակրոնի, Շոլցի, Միշելի հանդիպումը։ Եվ այդ հանդիպմանն ընդառաջ՝ Ադրբեջանի նախագահը ռազմական սպառնալիքի կիրառմամբ կրկին շանտաժի ենթարկեց ԼՂ-ին․ «Բոլորը գիտեն, որ այսօր այդ տարածաշրջանում մենք ցանկացած հնարավորություն ունենք՝ գործողություններ իրականացնելու համար, վերահսկում ենք ճանապարհը։ Այդ պատճառով խորհրդարանը պետք է ցրվի, իսկ նա, ով իրեն նախագահ է անվանում, պետք է հանձնվի։ Բոլոր նախարարները, պատգամավորները պետք է հեռացվեն պաշտոններից»։

Փաշինյանն առաջարկեց միջազգային հանրությանը՝ արձագանքել Ադրբեջանի նախագահին, ում այս հայտարարությունն անհասկանալի որակեց․ «Ե՛վ Ադրբեջանը, և՛ միջազգային գործընկերները պետք է առնվազն պարզաբանեն՝ արդյո՞ք դա նշանակում է հրաժարում Բրյուսելում ձեռք բերված պայմանավորվածություններից։ Տեքստը, որ հնչել է, շատ մոտ է դրան, չեմ ուզում մեկնաբանել, լրացուցիչ ճշգրտումներ պետք է մտցվեն»։

Ռազմաքաղաքական հարցերով փորձագետ Արմինե Մարգարյանը պնդում է, որ անհրաժեշտ է Ալիևի այս սպառնալիքը շատ լուրջ ընդունել և պատրաստվել հակաքայլերի։

«Ալիևի այս սպառնալիքը լուրջ է պետք ընդունել։ Ալիևն ավանտյուրայի կգնա՝ ԼՂ-ում լուրջ բախումներ կհրահրի, քանի որ սա իր վերջին շանսն է՝ ենթակայեցնելու Արցախը։ Ես կարծում եմ, որ լուրջ բախումներ է Ադրբեջանը հրահրելու, և ԼՂ-ն դիմադրելու է։ Պիտի պատրաստվենք այդ օրվան՝ բոլոր ռեսուրսներով։ Եթե Ադրբեջանը ԼՂ-ում կոշտ մեթոդներով էթնիկ զտման գնա, միայն այդ դեպքում ՄԱԿ-ի ԱԽ-ն կպարտադրի խաղաղապահ մեխանիզմ․ սրա՛ն պատրաստվենք»,- ասաց Արմինե Մարգարյանը։

Հարցազրույցն ամբողջությամբ՝ տեսանյութում։

Ռոբերտ Անանյան