Ալիևը համաձայն չէ անգամ Լավրովի ասածին՝ Դոնբասի մոդել ԼՂ-ում․ Ադրբեջանը պնդում է՝ հարցի լուծում իր Սահմանադրությամբ. Տիգրան Գրիգորյան․ ՏԵՍԱՆՅՈՒԹ

Իլհամ Ալիևը կրկին շանտաժի է ենթարկում ԼՂ-ին իշխանություններին` հայտարարելով՝ ինքը կմտածի Ղարաբաղի իշխանությունների նկատմամբ համաներման մասին, զիջումների կգնա, եթե կատարեն իր պայմանները:

«Բոլորը գիտեն, որ այսօր այդ տարածաշրջանում մենք ցանկացած հնարավորություն ունենք գործողություններ իրականացնելու համար։ Այդ պատճառով խորհրդարանը պետք է ցրվի, իսկ նա, ով իրեն նախագահ է անվանում, պետք է հանձնվի։ Բոլոր նախարարները, պատգամավորները պետք է հեռացվեն պաշտոններից»,- այսպիսի սպառնալիքներ է տեղացել Ադրբեջանի նախագահը։

Նիկոլ Փաշինյանն այսօր ԱԺ-ում բյուջե-2022-ի կատարողականի հաշվետվության նախնական քննարկման ժամանակ արձագանքեց Ալիևին՝ անհասկանալի համարելով նրա հայտարարությունները։

«Ե՛վ Ադրբեջանը, և՛ միջազգային գործընկերները պետք է առնվազն պարզաբանեն, թե արդյո՞ք դա նշանակում է հրաժարում Բրյուսելում ձեռք բերված պայմանավորվածություններից։ Տեքստը, որ հնչել է, շատ մոտ է դրան, չեմ ուզում մեկնաբանել, լրացուցիչ ճշգրտումներ պետք է մտցվեն»,- ասել է ՀՀ վարչապետը։

Ինչո՞ւ է Ալիևն ավելի սրում հռետորաբանությունը։ Քաղաքագետ Տիգրան Գրիգորյանը Factor TV-ին տված հարցազրույցում ասում է, որ Ալիևը փորձում է ձախողել խաղաղ բանակցությունները։

«ՀՀ-ի նախապայմանն է բանակցություններում միջազգային մեխանիզմը՝ Բաքու-Ստեփանակերտ խոսակցության ժամանակ։ Եվ ԱՄՆ-ն, ԵՄ-ն ճնշում են Ադրբեջանին, որպեսզի լուծում ստացվի։ Ալիևն այս սպառնալիքներով տորպեդահարում է քննարկումը՝ միջազգային մեխանիզմի շուրջ։ Եթե Ադրբեջանը նույնիսկ համաձայնվի միջազգային մեխանիզմին, պետք է հասկանալ՝ քննարկվելու է ԼՂ-ի իրավունքների և անվտանգության հարցը Ադրբեջանի կազմում՝ առանց կարգավիճակի։ Ադրբեջանը համաձայն չէ նույնիսկ Լավրովի ասածին՝ Դոնբասի մոդելին, Ալիևն ասում է ԼՂ-ին՝ հարցը լուծվի ադրբեջանական Սահմանադրությամբ։ Ըստ էության, Ալիևը հիմա ԼՂ-ի ինտեգրումից է խոսում՝ սպառնալով՝ հրաժարվեք պետական ինստիտուտներից, դարձեք Ադրբեջանի քաղաքացի, կմտածենք՝ համաներում հայտարարե՞նք, թե՝ ոչ»,- ասաց Տիգրան Գրիգորյանը։

Հարցազրույցն ամբողջությամբ՝ տեսանյութում։

Ռոբերտ Անանյան