Մոսկվան մտադիր է իրականացնել Անկարայի հետ բոլոր ռազմավարական նախագծերը․ ՌԴ ԱԳ փոխնախարար

Մոսկվան նպատակ ունի իրականացնել Անկարայի հետ բոլոր տնտեսական նախագծերը, որոնք ռազմավարական բնույթ ունեն և մնում են տարածաշրջանի անվտանգության կարևոր տարրը։ Այս մասին ՏԱՍՍ-ի հետ զրույցում ասել է ՌԴ ԱԳ փոխնախարար Ալեքսանդր Գրուշկուն՝ ամփոփելով Թուրքիայի նախագահական ընտրությունների արդյունքները։

«Մենք շարունակելու ենք մեր համագործակցությունը Թուրքիայի հետ, նպատակ ունենք իրականացնել բոլոր տնտեսական նախագծերը, որոնք ռազմավարական բնույթ են կրում, դրանք փոխշահավետ են, դրանք տարածաշրջանային անվտանգության կարևոր տարր են: Քաղաքական երկխոսությունը կշարունակվի։ Իհարկե, կան այլ ոլորտներ ևս, որոնք առանձնացնում են ռուս-թուրքական հարաբերությունները, դրանք են՝ տուրիզմը, մշակույթի ոլորտում կապերը և շատ այլ բաներ»,- ասել է նա։

Ռուս դիվանագետը հավելել է, որ Ռուսաստանի Դաշնության և Թուրքիայի միջև բոլոր պայմանավորվածությունները, այդ թվում՝ գազային հանգույցի նախագծի իրականացման վերաբերյալ, կրում են համակարգային բնույթ, աշխատանքն ընթանում է պլանի համաձայն։

«Կցանկանայի ընդգծել, որ պայմանավորվածությունները կրում են համակարգային ռազմավարական բնույթ։ Մենք դրանց ուղղությամբ աշխատում ենք ամենաբարձր մակարդակով պայմանավորվածություններին և յուրաքանչյուր նման նախագծի աշխատանքային պլաններին համապատասխան»,- ասել է Գրուշկոն։

Նա նաև հավելել է, որ Թուրքիան դրական դերակատարում է ունեցել հացահատիկային գործարքում։

Հավելենք, որ Էրդողանն ու իր թիմը նախընտրական քարոզարշավի ընթացքում պարբերաբար հանդես էին գալիս Ռուսաստանին սատարող հայտարարություններով։

Էմմա Չոբանյան