22.01.2026 | 17:30
ՀՀ-ում մոպեդների, տրիցիկլների և քվադրիցիկլների համար ԱՊՊԱ պայմանագրերը պարտադիր կդառնան
Լարսի անցակետում կանգնած և օրերով հերթում սպասող հարյուրավոր հայ վարորդների նման նախարարը չգիտի՝ խնդիրը երբ կլուծվի
Քաղաքականություն
03.07.2018 | 13:55
Արդեն մի քանի օր է`Հայաստանից Ռուսաստան մեկնած հարյուրավոր բեռնատարներ կանգնած են Լարսի սահմանին։
Վրացական և ռուսական կողմը թույլ չի տալիս հայ վարորդներին հատել սահմանը։
Հետաքրքրական է, որ վարորդների համար սահմանային անցակետում առաջացած կուտակումների վերաբերյալ որևէ հստակ պատճառաբանություն ո՛չ ռուսական կողմը, ո՛չ վրացական կողմը չի բերում, ինչն էլ հարուցել է հայ վարորդների դժգոհությունը, քանի որ բեռնատարներից շատերով Հայաստանից արտահանվում է ծիրան, որը ենթակա է փչացման։
Արդյոք հայկական կողմը փորձել է կապ հաստատել ռուսական և վրացական կողմի գործընկերների հետ հասկանալու խնդրի էությունը, ինչ քայլեր է այս առումով ձեռնարկում ՀՀ տրանսպորտի, կապի և տեղեկատվական տեխնոլոգիաների նախարարությունը․Factor.am-ը փորձեց ճշտել այդ գերատեսչությունից։
Նախարարի մամուլի խոսնակ Անահիտ Առաքելյանը մեզ հետ զրույցում նշեց, որ Լարսում հայ վարորդներին թույլ չեն տալիս հատել վրացական սահմանը, քանի որ առաջացել են տեխնիկական խնդիրներ․ «Բանն այն է, որ վրացական անցակետում ներդրվել է հերթերի ամրագրման նոր կարգ, ինչը դանդաղեցնում է մենքենաների բացթողնման գործընթացը։ Նախարար Աշոտ Հակոբյանն այս խնդրին տեղյակ է, բանակցում է և՛ վրացական, և՛ ռուսական կողմի հետ, որպեսզի խնդիրը լուծվի»։
Թե խնդիրը ինչ ժամկետում կլուծվի, նախարարի մամուլի խոսնակը դժվարացավ պատասխանել, նշելով՝ դա կախված է վրացական և ռուսական կողմերից։
Փաստորեն, ՀՀ համապատասխան գերատեսչությունը Լարսի անցակետում կանգնած և օրերով հերթում սպասող հայ վարորդների նման չգիտի՝ խնդիրը երբ կլուծվի։
Այս պարագայում մնում է հույսը դնել վրացական կողմի բարեհաճության վրա, որ հարյուրավոր հայ վարորդներ հերթում ևս մի քանի տանջալի օր չսպասեն, իսկ հայկական ծիրանն էլ առանց փչանալու հասնի Ռուսաստան։
Աղավնի Սուքիասյան
