14.08.2026 | 23:07
Ֆրանսիայի Սահմանադրական խորհուրդը չեղարկել է մինչև 15 տարեկանների համար սոցցանցերի արգելքը
Քըլըչդարօղլուն խոստացել է շարունակել պայքարն Էրդողանի դեմ
Քաղաքականություն
29.05.2023 | 12:41
Թուրքիայի ընդդիմության նախագահի միասնական թեկնածու Քեմալ Քըլըչդարօղլուն, որն ընտրությունների երկրորդ փուլում պարտվել է նախագահ Թայիփ Էրդողանին, հայտարարել է, որ շարունակելու է պայքարը՝ չնայած ընտրությունների արդյունքներին, գրում են տեղական լրատվամիջոցները։
Անկարայում Ժողովրդահանրապետական կուսակցության կենտրոնակայանում Քըլըչդարօղլուն ակնարկել է, որ կուսակցության նախագահի պաշտոնից չի հեռանա։ Նա ընտրությունները որակել է որպես վերջին տարիների ամենաանարդար ընտրական գործընթաց։
«Իմ սիրելի ժողովուրդ, ես չէի կարող թույլ տալ, որ ձեր իրավունքները ոտնահարվեն, և թույլ չտվեցի, անարդարությունների վրա աչք փակել չկարողացա և չարեցի։ Չէի կարող լռել, քանի դեռ մեր երեխաները պայքարում են գոյատևելու համար առանց աշխատանքի և հնարավորությունների»,- ասել է Քըլըչդարօղլուն։
Նա նաև ընդգծել է թուրք ժողովրդի միասնությունը՝ արտահայտելով իր ցանկությունը՝ տեսնել իրեն սատարող միլիոնավոր քաղաքացիներին կանգնած և տոկուն։
«Որպես այս հողի մարդ՝ ես պայքարել եմ և կշարունակեմ պայքարել ձեր իրավունքների և արդարության համար, որպեսզի ոչ ոք չկարողանա ձեզ ցավ պատճառել, և դուք կարողանաք ապրել խաղաղության մեջ»,- հայտարարել է Քըլըչդարօղլուն։
Էմմա Չոբանյան
