07.10.2026 | 23:48
Արթուր Դանիելյանը կալանավորվեց
Բաքվում Ալիևի նստավայրի մոտ «իրանական լրտեսների» հարազատները բողոքի ցույց են անցկացրել․ ԼՈՒՍԱՆԿԱՐՆԵՐ
Քաղաքականություն
26.05.2023 | 22:54
Ադրբեջանում հերթական բողոքի ակցիա են անցկացրել, իբր, Իրանի օգտին լրտեսության, ապօրինի թմրաշրջանառության մեղադրանքով կալանավորված կրոնական գործիչների հարազատները։ Տեղական լրատվամիջոցները հայտնում են, որ բողոքի ակցիան անցկացվել է Ադրբեջանի նախագահ Իլհամ Ալիևի նստավայրի մոտ։
Նրանք բարձրացրել են ձերբակալվածների դիմանկարները՝ հայտարարելով վերջինների անմեղության մասին։
Ակցիայի մասնակիցներից մեկը հայտնել է, որ չնայած մեղադրանքը պաշտոնապես ներկայացվել է թմրանյութերի մասով, սակայն կալանավորվածները հարցաքննվում են Իրանի հետ հնարավոր կապերի վերաբերյալ, իսկ կառավարամետ քարոզչությունը նրանց ներկայացնում է որպես «իրանական լրտեսներ»:
Ոստիկանները չեն միջամտել ակցիային, սակայն ցուցարարներին ուղղորդել են ընդունելության բաժին։ Ի վերջո, իրավապահները ցուցարարներին նստեցրել են ավտոբուս և հեռացրել տարածքից։
Հավելենք, որ վերջին ամիսներին Ադրբեջանում Իրանի հետ հարաբերությունների լարվածության ֆոնին շարունակվում են կրոնական ակտվիստների ու գործիչների զանգվածային ձերբակալությունները։ Որոշ տվյալներով՝ ձերբակալվածների թիվը շուրջ 400 է։ Իշխանամետ ու քարոզչական լրատվամիջոցներում այս ձերբակալությունները ներկայացվում են որպես «Իրանի լրտեսական ցանցի» բացահայտում։
Ադրբեջանի որոշ կազմակերպություններ համատեղ հայտարարությամբ էին հանդես եկել՝ դատապարտելով երկրում կրոնական ակտվիստների ու գործիչների ձերբակալություններն ու պահանջել ազատ արձակել նրանց։
Էմմա Չոբանյան
