Քաղաքականություն
26.05.2023 | 17:28
Թուրքիայի ընդդիմության միասնական թեկնածու Քեմալ Քըլըչդարօղլուի և ծայրահեղ ազգայնական Ումիթ Օզդաղի միջև համաձայնության ֆոնին՝ քուրդ քաղաքական գործիչները շարունակում են իրենց աջակցությունը հայտնել Քըլըչդարօղլուին նախագահական ընտրությունների երկրորդ փուլում, գրում է Gercek news-ը։
Քրդամետ HDP-ի համանախագահ Փերվին Բուլդանը և հայտնի քուրդ քաղաքական գործիչ Ահմեթ Թյուրքը Դիարբեքիրում մամուլի ասուլիս են հրավիրել, որի ընթացքում հայտարարել են. «Մեծ վճռականությամբ մենք գնալու ենք ընտրությունների և մեր ընտրությունն ենք կատարելու ֆաշիզմին պարտության մատնելու համար»։
Բուլդանն ընդգծել է գալիք ընտրությունների նշանակությունը Թուրքիայի ժողովրդավարական ապագայի և խաղաղության համար, հատկապես՝ երիտասարդության և կանանց։
«Եկեք օգտագործենք մեր ձայները երկրորդ փուլում, գնանք ընտրության և ցույց տանք մեր կամքն ու վճռականությունը, ինչպես առաջին փուլում, քանի որ ապագան և վաղը մեզ են վերաբերում։ Եթե ԱԶԿ-ն և Էրդողանը կրկին հաղթեն, դա կհանգեցնի թուրքական հասարակության խեղդմանը, դրա համար Էրդողանը պետք է գնա: Ես դա արտահայտում եմ այն համոզմունքով, որ Էրդողանի հեռանալը հասարակությանը թույլ կտա ազատ շնչել»,-ասել է նա։
Ահմեդ Թյուրքն իր հերթին նշել է, որ Թուրքիան անցնում է վճռորոշ շրջադարձի միջով։
«Մենք ապրում ենք փոփոխության և վերափոխման ցավերի միջով: Իհարկե, մեր նախապատվությունը անձերի հետ կապված չէ, մենք պայքարում ենք քուրդ ժողովրդի և Թուրքիայի ապագայի համար, և ըստ այդմ էլ մեր ընտրությունն ենք կատարում»,-ասել է նա։
Էմմա Չոբանյան
