Մասկի ընկերությանը թույլատրվել է ուղեղի համար նախատեսված չիպերը փորձարկել մարդկանց վրա

Ամերիկացի գործարար Իլոն Մասկի Neuralink ընկերությանը, որն ուղեղի համար չիպեր է ստեղծում, կլինիկական փորձարկումների թույլտվություն է ստացել։

«Ուրախ ենք հայտնել, որ ստացել ենք FDA-ի (Food and Drug Administration) թույլտվությունը՝ մարդկանց վրա մեր առաջին կլինիկական հետազոտությունը սկսելու համար»,- Twitter-ում հայտնել է Neuralink-ը:

Հաղորդագրության մեջ վստահութուն է հայտնվում, որ Neuralink-ի տեխնոլոգիան թույլ կտա օգնել շատ մարդկանց։ Ընկերությունը նաև հայտնել է, որ առաջին կլինիկական փորձարկումներին մասնակցել ցանկացողների հավաքագրումը դեռևս չի սկսվել, սակայն հավելյալ տեղեկությունները կհրապարակվեն մոտ ժամանակներում։

Մարտի սկզբին Reuters-ը, վկայակոչելով Neuralink-ի ներկայիս և նախկին աշխատակիցներին, հայտնել էր, որ FDA-ը մերժել է Մասկին և նրա ընկերության՝ չիպերը մարդկանց վրա փորձարկելու խնդրանքը: Գործակալությունն այն ժամանակ նշել էր տասնյակ խնդիրներ, որոնք ընկերությունը պետք է լուծեր փորձարկումներ կատարելուց առաջ։

Neuralink-ը նեյրոչիպերի մշակման Մասկի ընկերությունն է: Այն թույլ կտա ուղեղին ազդանշաններ փոխանցել Bluetooth-ի միջոցով։ Այսպիսով, դրա օգնությամբ հնարավոր կլինի ուղղակիորեն կառավարել համակարգիչը կամ սմարթֆոնը։

Ենթադրվում է, որ ընդունիչի պարկուճը կկցվի ականջին՝ ինչպես լսողական սարքը։ Թելավոր էլեկտրոդները դրանից կուղղվեն դեպի ուղեղ։ Ընդհանուր առմամբ, ուղեղում տեղադրվում է մինչև 1500 էլեկտրոդ, որոնցից յուրաքանչյուրը չորս անգամ ավելի բարակ է, քան մարդու մազը։

Մասկի խոսքով՝ չիպը կօգնի վերահսկել հորմոնները, հաղթահարել անհանգստությունը և նույնիսկ կստիպի ուղեղին ավելի արդյունավետ աշխատել։ Առաջին փորձարկումներն արդեն անցկացվել են առնետների և կապիկների վրա, որոնք հաջող են անցել, պնդում է ձեռնարկատերը։

Տաթև Ֆռանգյան