25.05.2026 | 23:41
Գյումրիի արտահերթ ընտրություններ ենք իրականացնելու. Նիկոլ Փաշինյան. ՏԵՍԱՆՅՈՒԹ
Գազայում ՀԱՄԱՍ-ը ղեկավարելու է սպանված Յահյա Սինվարի եղբայրը․ WSJ
Քաղաքականություն
13.01.2025 | 16:54
2024 թվականի հոկտեմբերին պաղեստինյան ՀԱՄԱՍ-ի առաջնորդ Յահյա Սինվարի մահից հետո շարժումը ղեկավարել է նրա կրտսեր եղբայրը՝ Մուհամեդ Սինվարը, հայտնում է The Wall Street Journal-ը՝ հղում անելով իր աղբյուրներին։
Ըստ նրանց՝ թեև Կատարում ՀԱՄԱՍ-ի քաղաքական գրասենյակը որոշել է շարժվել դեպի կոլեկտիվ ղեկավարություն, անկլավում գտնվող խմբավորման զինյալները հրաժարվել են հնազանդվել և որոշել են «ինքնավար գործել»:
Ըստ WSJ-ի՝ Մուհամեդ Սինվարը մոտ 50 տարեկան է։ Նա երիտասարդ տարիքում միացել է ՀԱՄԱՍ-ին և մտերիմ է եղել շարժման զինված թևի ղեկավար Մուհամեդ Դեյֆի հետ, որը սպանվել է անցյալ տարվա օգոստոսին։ Ի տարբերություն ավագ եղբոր՝ Մուհամեդ Սինվարը «զգալի ժամանակ» չի անցկացրել իսրայելական բանտում, ինչը նրան Իսրայելի անվտանգության ծառայությունների համար ավելի քիչ հասկանալի է դարձնում։ Կուլիսներում աշխատելու տարիների ընթացքում նա վաստակել է «Ստվեր» մականունը, հայտնում են WSJ-ի աղբյուրները։
Պարբերականի աղբյուրները պնդում են, որ Մուհամեդ Սինվարը Իսրայելի հետ գործարքի շրջանակում ձգտում է վերականգնել ՀԱՄԱՍ-ի ռեսուրսները, ամրապնդել շարժման դիրքերը Գազայի հատվածում և երկարաժամկետ խաղաղության հասնել անկլավում։ Ըստ իսրայելական բանակի՝ մարտերի ընթացքում իսրայելական բանակը սպանել է շարժման 30,000 զինյալներից 17,000-ին, իսկ հազարավորներին՝ կալանավորել: Սակայն վերջին մի քանի ամիսների ընթացքում, ըստ WSJ-ի, հարյուրավոր նոր զինյալներ են միացել շարժմանը։
Թարգմանությունը՝ Տաթև Ֆռանգյանի
