06.06.2026 | 18:40
Ստեփանավանի տարածաշրջանում կարկուտ է տեղացել․ կան վնասներ
Ադրբեջանի ԱԳՆ պատվիրակությունն ԱՄՆ Պետքարտուղարությունում և Պենտագոնում հանդիպումների ընթացքում տարածաշրջանային անվտանգության հարցեր է քննարկել
Քաղաքականություն
26.05.2023 | 17:48
Աշխատանքային այցով ԱՄՆ-ում գտնվող Ադրբեջանի ԱԳ փոխնախարար Էլնուր Մամեդովը մայիսի 22-24-ը մի շարք հանդիպումներ է անցկացրել։ Ավելի վաղ հայտնել էինք, որ ադրբեջանական պատվիրակությունը մի շարք սենատորների ու կոնգրեսականների հետ հանդիպումներ է անցկացրել՝ բողոքելով Հայաստանից, որ, իբր, Երևանը Լաչինի միջանցքի շուրջ ստեղծված իրավիճակի մասին կեղծիքներ է տարածում։
Ադրբեջանի ԱԳՆ-ի հաղորդմամբ՝ հանդիպումներ են տեղի ունեցել նաև Պետքարտուղարությունում և Պենտագոնում։ Ադրբեջանական պատվիրակությունը հանդիպել է ԱՄՆ պետքարտուղարի քաղաքական-ռազմական հարցերով օգնականի առաջին տեղակալ Սթենլի Բրաունի, Եվրոպայի և Եվրասիայի հարցերով ԱՄՆ պետքարտուղարի փոխտեղակալ Էրիկա Օլսոնի և պետքարտուղարի ժողովրդավարության, մարդու իրավունքների հարցերով տեղակալ Կարա Մաքդոնալդի հետ։ Հանդիպումների ընթացքում մտքերի փոխանակություն է տեղի ունեցել ադրբեջանա-ամերիկյան հարաբերությունների զարգացման ներկա վիճակի և հեռանկարների, տարածաշրջանային անվտանգության հարցերի, ռազմաքաղաքական, հումանիտար և այլ ոլորտներում երկու երկրների համագործակցության վերաբերյալ։
Պատվիրակությունը հանդիպել է նաև ԱՄՆ պաշտպանության նախարարի՝ Ռուսաստանի, Ուկրաինայի և Եվրասիայի հարցերով փոխտեղակալ Լաուրա Կուպերի հետ։ Կողմերը քննարկել են երկու երկրների միջև պաշտպանության, ռազմական պատրաստության և կրթության հարցեր, համագործակցությունը կրթության ոլորտում։
Բացի այդ, Մամեդովը մասնակցել է առաջատար վերլուծական կենտրոններում կլոր սեղան-քննարկումների։
Էմմա Չոբանյան
