16.01.2026 | 15:07
Սուրեն Պապիկյանն այցելել է ՊՆ զորամասերից մեկը
ԱՄՆ-ում Կապիտոլիումի վրա հարձակվողը դատապարտվել է 18 տարվա ազատազրկման
Քաղաքականություն
26.05.2023 | 16:06
Վաշինգտոնի դատարանը մայիսի 25-ին Oath Keepers-ի հիմնադիր Ստյուարտ Ռոդսին դատապարտել է 18 տարվա ազատազրկման՝ կապված երկու տարի առաջ Կապիտոլիումի վրա գրոհի հետ, փոխանցում է DW-ի ռուսական ծառայությունը:
Սա այս գործով մինչ այժմ կիրառված ամենախիստ պատիժն է, որով մեղադրանք է առաջադրվել ավելի քան 1000 մեղադրյալի։
Մեղադրող կողմը պահանջել էր Ռոդսին դատապարտել 25 տարվա ազատազրկման։
Նախկին դեսանտային, իսկ հետագայում փաստաբան Ստյուարտ Ռոդսը դատավարության ժամանակ իրեն անվանել է «քաղբանտարկյալ»։
Նոյեմբերին երդվյալ ատենակալները նրան մեղավոր են ճանաչել «ապստամբային դավադրության մեջ»: ԱՄՆ-ում այս իրավական եզրույթը ներառում է նաև իշխանությունը բռնի տապալելու փորձը։
2021 թվականի հունվարի 6-ին այն ժամանակվա նախագահ Դոնալդ Թրամփի հազարավոր կողմնակիցներ ներխուժեցին Կապիտոլիում, որպեսզի թույլ չտան ԱՄՆ Կոնգրեսին հաստատել նախագահական ընտրություններում պետության ներկայիս ղեկավար Ջո Բայդենի հաղթանակը։ Արդյունքում սպանվել է չորս օրինազանց և մեկ ոստիկան։ Եվս 140 ոստիկան վիրավորվել է, նրանցից մի քանիսը հետագայում ինքնասպան են եղել։
Այն ժամանակ Ստյուարտ Ռոդսը գտնվել է Կապիտոլիումի տարածքում, սակայն չի մտել Կոնգրեսի շենք: 2009 թվականին նրա հիմնադրած Oath Keepers-ի անդամներն ԱՄՆ վարչակազմին մեղադրում էին իրենց իրավունքները ոտնահարելու մեջ։ Խումբը զբաղվում է ոստիկանների, զինվորների և բուժքույրերի հավաքագրմամբ։ Այս կազմակերպության անդամները հաճախ զինված են գալիս ցույցերի և քաղաքական միջոցառումների:
Տաթև Ֆռանգյան
