13.01.2025 | 18:26
«Մայր Հայաստան» խմբակցությունը Երևանի ավագանու արտահերթ նիստ կգումարի
Ադրբեջանում հեղեղներ են․ ջուրը քշել տարել է մարդկանց
Քաղաքականություն
26.05.2023 | 15:27
Ադրբեջանում հորդառատ անձրևների հետևանքով նախօրեին կրկին հեղեղներ են առաջացել։ Տեղական լրատվամիջոցները հայտնում են, որ հեղեղվել են Գյոյգյոլի շրջանի մի շարք գյուղեր։ Համացանցում տեսանյութեր են տարածվում։
Գյոյգյոլի շրջանի արտակարգ իրավիճակների հանձնաժողովը հայտնել է, որ հզոր սելավները լուրջ վնաս են հասցրել ցանքատարածություններին, էլեկտրաէներգիայի անջատումների պատճառ դարձել: Հեղեղները վնասել են ավտոմեքենաներ, օբյեկտներ, տներ, սատկել են խոշոր եղջերավոր անասուններ։ Տարերային աղետից տուժած բնակավայրերում ներգրավվել են համապատասխան կառույցների և գերատեսչությունների աշխատակիցներ և տեխնիկա։ Չորս գյուղերում վերականգնվել է գազամատակարարումը և էլեկտրաէներգիան։
Հեղեղների հետևանքով նաև զոհեր կան։ Մասնավորապես, համացանցում կադրեր են տարածվել, թե ինչպես է հեղեղը երկու հոգու քշել տարել Թոփալհասանլի գյուղում։
1954 թվականին ծնված Մուխտար Հուսեյնովի և 2001 թվականին ծնված Իբրահիմ Գորբանովի մարմինները հայտնաբերվել են ու փոխանցվել համապատասխան կառույցներին։
Հավելենք, որ օրերս էլ հորդառատ անձրևները հեղեղներ էին առաջացրել Նախիջևանում։ Անձրևաջրերը լցվել էին կրթական հաստատությունների, հիվանդանոցների շենքեր, տներ, վնասել ենթակառուցվածքները։
Էմմա Չոբանյան
