Ալիևը հայտարարել է, թե Հայաստանի և Ադրբեջանի միջև հարաբերությունների կարգավորման լուրջ նախադրյալներ կան

Ադրբեջանի համագործակցությունը ԵՏՄ անդամ երկրների հետ, բացառությամբ՝ Հայաստանի, հաջողությամբ զարգանում է արդեն 30 տարի։ Այս մասին մայիսի 25-ին Մոսկվայում հայտարարել է Ադրբեջանի նախագահ Իլհամ Ալիևը՝ առաջին անգամ ելույթ ունենալով Եվրասիական տնտեսական բարձրագույն խորհրդի ընդլայնված կազմով նիստում։

«Ադրբեջանի և Հայաստանի միջև հարաբերությունների կարգավորման լուրջ նախադրյալներ կան՝ տարածքային ամբողջականության և ինքնիշխանության փոխադարձ ճանաչման հիման վրա»,- ասել է Ալիևը՝ հավելելով, որ ավելի ուշ ռուսական կողմի նախաձեռնությամբ կկայանա Ադրբեջանի, Ռուսաստանի և Հայաստանի ղեկավարների եռակողմ հանդիպումը։

Նա նաև նշել է, որ կան Հայաստանի հետ խաղաղության պայմանագրի ստորագրման հնարավորություններ։

«Հնարավորություն կա խաղաղության համաձայնության հասնելու՝ հաշվի առնելով, որ Հայաստանը ճանաչել է Ղարաբաղը որպես Ադրբեջանի մաս»,- հայտարարել է Ադրբեջանի նախագահը։

Ի դեպ, Ալիևը նաև նշել է, որ Ադրբեջանի վերահսկողության տակ անցած Բերձորի շրջանում միջազգային օդանավակայան է կառուցվում, որը նախատեսվում է շահագործման հանձնել 2025 թվականին։

Բացի այդ, Ալիևը շարունակել է խոսել գոյություն չունեցող և միջազգային որևէ փաստաթղթում չամրագրված «Զանգեզուրի միջանցքից»։

««Զանգեզուրի միջանցքը» ոչ միայն կկապի Ադրբեջանի հիմնական մասը Նախիջևանի Ինքնավար Հանրապետության հետ, այլեւ կդառնա միջազգային երկաթուղային երթուղիների մաս»,- ասել է նա։

Էմմա Չոբանյան