07.10.2026 | 23:48
Արթուր Դանիելյանը կալանավորվեց
Մոսկվան և Մինսկը Բելառուսում միջուկային զենքի տեղակայման մասին փաստաթղթեր են ստորագրել
Քաղաքականություն
25.05.2023 | 14:23
Բելառուսի և Ռուսաստանի ՊՆ ղեկավարներ Վիկտոր Խրենինը և Սերգեյ Շոյգուն Մինսկում ստորագրել են փաստաթղթեր, որոնք սահմանում են ռուսական ոչ ռազմավարական միջուկային զենքի պահպանման կարգը բելառուսական տարածքում, գրում է DW-ի ռուսական ծառայությունը։
«Հանդիպման ընթացքում ստորագրվել են փաստաթղթեր, որոնք որոշում են Բելառուսի Հանրապետության տարածքում գտնվող հատուկ պահեստում ռուսական ոչ ռազմավարական միջուկային զենքի պահպանման կարգը»,- ասվում է Բելառուսի ՊՆ հաղորդագրության մեջ։
Հանդիպմանը Շոյգուն նշել է, որ «ՆԱՏՕ-ի համատեղ միջուկային առաքելությունների ակտիվությունը» Ռուսաստանին և Բելառուսին ստիպում է քայլեր ձեռնարկել։
«Մեր գերագույն հրամանատարների որոշման համաձայն՝ աշխատանքներ են կազմակերպվել Բելառուսի տարածքում ՌԴ ոչ ռազմավարական միջուկային զենքի տեղակայման ուղղությամբ»,- ասել է Սերգեյ Շոյգուն։
Նա հավելել է, որ Ռուսաստանի և Բելառուսի կողմից իրականացվող միջոցառումները «համապատասխանում են գոյություն ունեցող բոլոր միջազգային իրավական պարտավորություններին», և ընդգծել, որ ՌԴ-ն Բելառուսում ոչ ռազմավարական միջուկային զենք տեղակայելով՝ այն չի հանձնում Մինսկին, իսկ միջուկային զենքի նկատմամբ վերահսկողությունը և դրա կիրառման որոշումը պետք է կայացնի Մոսկվան։
Իր հերթին, Խրենինը Բելառուսում Ռուսաստանի Դաշնության միջուկային զենքն անվանել է «պատասխան ոչ բարեկամ երկրների ագրեսիվ քաղաքականությանը», ինչը պետք է հիշեցնի «տարածաշրջանում իրավիճակի հետագա սրման անթույլատրելիության մասին»։
Էմմա Չոբանյան
