19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Շոյգուն հայտարարել է, թե Արևմուտքն ամեն կերպ «փորձում է միջամտել ԼՂ-ում իրավիճակին՝ վարկաբեկելով ռուս խաղաղապահներին»
Քաղաքականություն
25.05.2023 | 14:42
Արևմուտքն ամեն կերպ փորձում է միջամտել Լեռնային Ղարաբաղի շուրջ ստեղծված իրավիճակին, մեծացնել իր ներկայությունը և վարկաբեկել ռուսական խաղաղապահ քաղաքականությունը։ Այս մասին հայտարարել է ՌԴ պաշտպանության նախարար Սերգեյ Շոյգուն՝ Մինսկում ՀԱՊԿ անդամ երկրների ՊՆ ղեկավարների խորհրդի նիստում, գրում է ՏԱՍՍ-ը։
«Ինչ վերաբերում է կովկասյան տարածաշրջանում տիրող իրավիճակին, ապա դա մեծապես պայմանավորված է հայ-ադրբեջանական հակամարտության կարգավորման աստիճանով: Այժմ Լեռնային Ղարաբաղում անվտանգության ապահովմանն աջակցում է ռուսական խաղաղապահ զորախումբը: Սակայն Արևմուտքը փորձում է ամեն կերպ միջամտել իրավիճակին, մեծացնել իր ներկայությունը և վարկաբեկել ռուսական խաղաղապահ քաղաքականությունը»,- ասել է Շոյգուն։
Նա նշել է, որ Արևմուտքի հիմնական խնդիրը, իբր, Հարավային Կովկասից Ռուսաստանին դուրս մղելն է, այլ ոչ թե «երկարաժամկետ հեռանկարում տարածաշրջանի անվտանգությունն ու բարգավաճումն ապահովելը»։
«Դրա օրինակը, այսպես կոչված, ԵՄ քաղաքացիական առաքելությունն է Հայաստանում, որում ներառված են զինվորականներ և հատուկ ծառայությունների աշխատակիցներ։ Կարծում եմ՝ պետք չէ բացատրել, թե նրանք իրականում ինչով են զբաղվում։ Այդ կապակցությամբ մենք անհրաժեշտ ենք համարում շարունակել աշխատանքը տարածաշրջան ՀԱՊԿ առաքելություն ուղարկելու ուղղությամբ»,- ասել է Շոյգուն։
Ի դեպ, ՌԴ ՊՆ ղեկավարն այդպես էլ չի նշել՝ արդյո՞ք Արցախում տեղակայված ռուսական խաղաղապահ զորախումբը, ի վերջո, կատարելու է 2020 թվականի նոյեմբերի 9-ի եռակողմ հայտարարությամբ ստանձնած պարտավորություններն ու ապահովելու է Լաչինի միջանցքով ազատ տեղաշարժը։
Հիշեցնենք՝ ապրիլի 23-ից Ադրբեջանն ապօրինի անցակետ է տեղադրել Լաչինի միջանցքում՝ է՛լ ավելի խորացնելով Արցախի շրջափակումը։ ՌԴ-ն, սակայն, որևէ գործուն քայլ չի անում անցակետի վերացման ուղղությամբ։
Էմմա Չոբանյան
